Stelpurnar leika um 5. sætið

Ísland spilar um 5. sætið á EM U-19 ára í handbolta kvenna sem fer fram í Búlgaríu.

Þetta var ljóst eftir sigur Íslendinga á Finnum, 23-19, í dag. Staðan í hálfleik var 12-9, Íslandi í vil.

Lena Margrét Valdimarsdóttir, Birta Rún Grétarsdóttir og Anna Hansdóttir skoruðu allar fimm mörk fyrir Ísland. Alexandra Líf Arnarsdóttir skoraði þrjú mörk.

Jónína Hlín Hansdóttir var valin maður leiksins en hún lék vel í íslensku vörninni eins og hún hefur gert allt mótið.

Ísland mætir annað hvort Ísrael eða Grikklandi í leiknum um 5. sætið á EM klukkan 13:00 á morgun.