Handbolti

Strákarnir fengu skell á móti Norðmönnum

Óskar Ófeigur Jónsson skrifar
Fyrirliðinn Elliði Snær Viðarsson nýtti öll þrjú skotin sín en sömu sögu er ekki hægt að segja um félaga hans.
Fyrirliðinn Elliði Snær Viðarsson nýtti öll þrjú skotin sín en sömu sögu er ekki hægt að segja um félaga hans. Vísir/Daníeæ

Íslenska 21 árs landslið karla í handbolta tapaði í morgun fyrsta leiknum sínum á heimsmeistaramótinu á Spáni og fyrsta tapið var stór skellur.

Íslensku strákarnir töpuðu þá með tíu marka mun á móti Norðmönnum, 29-19 en fyrstu tveir leikir íslenska liðsins á mótinu höfðu unnist á móti Síle og Argentínu.

Orri Freyr Þorkelsson var markahæstur hjá íslenska liðinu í leiknum með fjögur mörk. Fyrirliðinn Elliði Snær Viðarsson og Bjarni Ófeigur Valdimarsson skoruðu báðir þrjú mörk.

Norðmenn voru með einn sigur og eitt tap fyrir leikinn en sýndu styrk sinn í öruggum sigri á íslenska liðinu. Norska liðið komst mest tólf mörkum yfir en íslenska liðið lagaði stöðuna aðeins í lokin.

Robin Paulsen Haug, markvörður norska landsliðsins var íslenska liðinu mjög erfiður í leiknum en hann varði sautján skot þar af þrjú víti og mörg dauðafæri.

Íslensku strákarnir komust í 1-0 en það var líka í eina skiptið sem íslenska liðið var yfir í leiknum. Norðmenn skoruðu þrjú næstu mörk og voru komnir með forystuna sem þeir héldu út leikinn.

Norska liðið náði fljótlega fjögurra marka forystu, 7-3, og var síðan sex mörkum yfir í hálfleik, 17-11.

Einar Andri Einarsson tók leikhlé í stöðunni 21-14 fyrir Norðmenn og reyndi að kveikja í sínum mönnum þegar átján mínútur voru eftir. Það tókst hins vegar ekki. Tvö víti fóru í forgörðum hjá íslensku strákunum í framhaldinu, liðið lenti mest tólf mörkum undir og í endann munaði tíu mörkum á liðunum.

Tveir léttustu leikir íslenska liðsins í riðlinum eru að baki og ljóst að róðurinn verður þungur í síðustu tveimur leikjunum á móti Danmörku og Þýskalandi.

Mörk íslenska liðsins í leiknum:
Orri Freyr Þorkelsson 4/2
Elliði Snær Viðarsson 3    
Bjarni Ófeigur Valdimarsson 3
Gabríel Martinez Róbertsson 2
Ásgeir Snær Vignisson 2
Jakob Martin Ásgeirsson 2
Örn Vésteinsson Östenberg 1
Kristófer Andri Daðason 1
Hafþór Már Vignisson 1



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.