Fyrsta tap Portland í tæpa tvo mánuði

Dagný Brynjarsdóttir var í byrjunarliði Portland Thorns og lék allan leikinn þegar liðið tapaði fyrir Seattle Reign, 0-1, í bandarísku kvennadeildinni í nótt. Spænska landsliðskonan Celia Jiménez skoraði eina mark leiksins á 55. mínútu.

Þetta var aðeins annað tap Portland á tímabilinu og það fyrsta síðan 18. maí.

Með sigrinum komst Seattle á topp deildarinnar. Portland er í 3. sætinu með 19 stig, stigi á eftir Seattle.

Dagný hefur komið við sögu í tíu af ellefu leikjum Portland á tímabilinu og skorað eitt mark.

Næsti leikur Portland er gegn Orlando Pride 14. júlí.