Nýjar áskoranir vegna rafbílavæðingar: „Menn geta bara fengið banvænan straum“

Rafbílavæðingunni fylgir nýjar áskoranir fyrir slökkviliðsmenn sem hafa nú þurft að temja sér breytt vinnubrögð í umgengni sinni við rafbílana. Ekki þurfi þó að óttast nýjar áskoranir því þvert á móti sé mikilvægt að finna leiðir til að aðlagast nýjum og umhverfisvænni veruleika.

Þetta segir Pétur Pétursson, formaður Landssambands slökkviliðsstjóra, í samtali við Reykjavík síðdegis. Hann segist undrast mjög á því að löggjafinn hafi ekki nú þegar aðgreint rafbíla frá olíu- og díselbílum með því að hafa mismunandi liti á númeraplötunum rafbíla líkt og tíðkist í Noregi. Það myndi auðvelda slökkviliðsmönnum mjög við störf.

Ein af áskorunum sem Pétur nefnir er þegar slökkviliðsmenn þurfa að klippa fólk út úr rafbílum á slysstað.

„Það er engin stöðlun á því hvernig slökkviliðsmenn geta slegið af rafmagnið á bílunum. Það getur verið hingað og þangað og erfitt að finna það út. Klippi menn á rafmagnsstrengi eða í batteríin sjálf geta menn bara fengið banvænan straum,“ segir Pétur.

Straumurinn geti verið það krafmikill að hann geti jafnvel valdið varanlegum skaða. Hann segist vona að slökkviliðsmenn fái aðgang að sameiginlegum gagnagrunni bílaframleiðenda til að slökkviliðsmenn geti að glöggvað sig betur á hinum ýmsu gerðum rafbíla. Þannig yrði auðvelt að fletta viðkomandi bíl upp.

„Það er engin stöðlun. Það er gjörsamlega ómögulegt fyrir slökkviliðsmenn að þekkja allar bílategundir og jafnvel týpur innan bílategunda og það getur breyst milli ára.“

Pétur tekur það sérstaklega fram að fólk ætti ekki að varast rafbíla heldur væri hann að kalla eftir samráði og aðgerðum sem myndu auðvelda slökkviliðsmönnum að umgangast bílana í störfum sínum.

Ekki meiri eldhætta af rafbílum

Pétur segir það sé ekki algengara að eldur kvikni í rafbílum en í olíu- og díselbílum.

„Það er gríðarlega vel frá þessu gengið og ef það kviknar í bílunum út frá öðrum orsökum þá eru rafhlöðurnar vel skermaðar af þannig að það eru litlar líkur á að það kvikni í þeim út frá því.“

Málin flækist aftur á móti þegar eldsupptökin eru í raflöðunni sjálfri.

„Þá er svo gríðarlega hátt hitastig að það er bara fátt sem getur slökkt í því á meðan það er að brenna úr sér.“

Aðspurður hvort ökumenn raftækja þurfi að koma sér fyrr út úr bíl eftir slys vegna mögulegrar eldhættu svarar Pétur því til að það eigi alls ekki bara við um rafbíla.

„Það er í rauninni með alla bíla í dag - […] þessi plastefni og annað sem þessir bílar eru gerðir úr að innan – menn þurfa bara að koma sér langt frá og ekki anda að sér reyknum því hann er virkilega eitraður. Við sendum okkar slökkviliðsmenn ekki til þess að slökkva í þeim nema með reykköfunartæki og það á við bara um bílbruna almennt,“ segir Pétur.