Ef marka má textaspá Veðurstofu Íslands fyrir morgundaginn, sumardaginn fyrsta, gæti hiti náð allt að 17 stigum þegar sumarið gengur loks í garð. Spáð er bjartviðri víða um land en það mun þykkna upp seinni partinn og rigna um kvöldið. Áfram verður þó þurrt norðanlands.

Í hugleiðingum veðurfræðings á vef Veðurstofunnar segir að í dag, á morgun og í raun alveg fram í næstu viku sé útlit fyrir austlægan vinda og óvenju litla tilbreytingu í vindátt. Þá sé loftið sem berst yfir landið talsvert hlýrra en það sem gengur og gerist á þessum árstíma.

Búast má við því að regnsvæði berist öðru hvoru yfir landið en á milli þeirra munu koma ágætir þurrir kaflar, til dæmis á sumardaginn fyrsta.

„Þá er útlit fyrir verði bjart nokkuð víða og hitinn gæti náð í um eða yfir 15 stig í mörgum landshlutum. Það er þó ekki von á að hitinn nái sér á strik með austurströndinni þar sem blæs af hafi og ekki er loku fyrir það skotið að þoka láti á sér kræla á þeim slóðum. Seinnipart fimmtudags þykknar upp á landinu og fer að rigna um kvöldið, en áfram þurrt norðanlands,“ segir í hugleiðingum veðurfræðings.

Veðurhorfur á landinu:

Austlæg átt 3-10 m/s í dag, en 10-15 syðst. Rigning eða súld, en þurrt á Norður- og Austurlandi. Hiti 7 til 16 stig, hlýjast norðaustanlands.

Austan 8-13 á morgun, en 13-18 með suðurströndinni. Víða bjartviðri, en þokubakkar austast á landinu. Hiti 10 til 17 stig, en svalara á Austfjörðum. Þykknar upp seinnipartinn og fer að rigna annað kvöld, en áfram þurrt norðanlands.

Á fimmtudag (sumardagurinn fyrsti):
Austan 8-13 m/s, en 13-18 með suðurströndinni. Víða bjartviðri, en þokubakkar austast á landinu. Hiti 10 til 17 stig, en svalara á Austfjörðum. Þykknar upp seinnipartinn og fer að rigna um kvöldið, en áfram þurrt norðanlands.

Á föstudag:
Austan 5-13 m/s með vætu, en úrkomulítið um landið vestanvert. Hiti frá 6 stigum austast, upp í 15 stig á Vesturlandi.

Á laugardag:
Austan 5-13 og rigning með köflum um allt land. Hiti breytist lítið.

Á sunnudag, mánudag og þriðjudag:
Austanátt, víða 5-10 m/s. Dálítil væta af og til um landið austanvert, en lengst af þurrt annars staðar. Hiti 7 til 15 stig, hlýjast á Vesturlandi.