Gæddi sér á snakki eftir endurkomuna sögulegu

Þrátt fyrir að lenda mest 31 stigi undir vann Los Angeles Clippers magnaðan sigur á meisturum Golden State Warriors, 131-135, í öðrum leik liðanna í 8-liða úrslitum úrslitakeppni Vesturdeildarinnar í NBA í nótt. Staðan í einvíginu er jöfn, 1-1. Vinna þarf fjóra leiki til að komast áfram í næstu umferð.

Sigur Clippers var sögulegur en aldrei hefur lið komið til baka og unnið eftir að hafa lent jafn mörgum stigum undir í leik í úrslitakeppni NBA. Þetta er jafnframt mesta endurkoma í sögu Clippers.

Lou Williams átti frábæran leik fyrir Clippers í nótt. Hann skoraði 36 stig og gaf ellefu stoðsendingar. Tólf stiganna komu í 4. leikhluta sem Clippers vann, 41-23.

Eftir sigurinn ótrúlega gæddi Williams sér á snakki á meðan hann hékk í símanum. Clippers birti skemmtilega mynd af þessum hófstillta fagnaði skotbakvarðarins á Twitter.

*completes largest comeback in franchise history*

*grabs snacks*

*checks @Twitter*@TeamLou23 | #ClipperNationpic.twitter.com/HwEPi8y6CB

— LA Clippers (@LAClippers) April 16, 2019

Þrátt fyrir að byrja nánast undantekningarlaust á bekknum er Williams stigahæsti leikmaður Clippers á tímabilinu með 20,0 stig að meðaltali í leik. Hann er einnig með 3,0 fráköst og 5,4 stoðsendingar að meðaltali í leik.

Williams þykir mjög líklegur til að vera valinn besti sjötti leikmaður NBA-deildarinnar. Hann fékk þau verðlaun 2015 og 2018.