Innlent

Gerir ráð fyrir því að dómsmálaráðherra njóti stuðnings hjá samstarfsflokkum í ríkisstjórn

Margrét Helga Erlingsdóttir skrifar
Þingflokksformaður Sjálfstæðisflokksins segir niðurstöðu MDE hvorki hrófla við skipan dómara við Landsrétt né niðurstöðu hans.
Þingflokksformaður Sjálfstæðisflokksins segir niðurstöðu MDE hvorki hrófla við skipan dómara við Landsrétt né niðurstöðu hans. Vísir/vilhelm

Birgir Ármannsson, þingflokksformaður Sjálfstæðisflokksins, gerir ráð fyrir því að Sigríður Andersen, dómsmálaráðherra, njóti áfram stuðnings hjá samstarfsflokkum Sjálfstæðisflokksins í ríkisstjórn í ljósi þess að öll álitamál og ágreiningsefni hafi legið fyrir um langt skeið. Birgir segir að dómur MDE hrófli hvorki við skipan dómara við Landsrétt né niðurstöðum hans.

Sigríður braut gegn 6. grein mannréttindasáttmála Evrópu, sem kveður á um rétt einstaklinga til réttlátrar málsmeðferðar fyrir dómi, með skipan dómara í Landsrétt. Þetta er niðurstaða Mannréttindadómstólsins sem kvað upp dóm sinn í morgun. Ráðherra fór ekki að tillögu hæfisnefndar við skipanina heldur skipti fjórum sem voru á meðal fimmtán tilnefndra af hæfisnefnd út fyrir aðra fjóra umsækjendur.

Birgir segir að Sigríður njóti stuðnings Sjálfstæðisflokksins í málinu sem fyrr og fullyrðir að það sé enginn í þingflokki Sjálfstæðisflokksins sem kalli eftir því að hún stigi til hliðar.

„Allar þessar línur hafa legið fyrir og gerðu það síðast þegar stjórnarandstaðan reyndi að knýja fram vantraust á dómsmálaráðherrann fyrir ári,“ segir Birgir í samtali við fréttastofu.

Birgir Ármannsson, þingflokksformaður Sjálfstæðisflokksins, segir Sigríði njóta áfram stuðnings Sjálfstæðisflokksins og á ekki von á öðru en að samstarfsflokkar í ríkisstjórn séu sama sinnis. Vísir/Egill

Er ósammála niðurstöðu Hæstaréttar og MDE

Birgir Ármannsson segist vera ósammála niðurstöðu MDE í málinu.

„Það vekur athygli mína að minnihluti dómsins – tveir dómarar – eru með sérálit þar sem þeir í raun gagnrýna aðferðafræði og niðurstöðu meirihlutans harðlega og það undirstrikar þau lögfræðilegu álitamál sem þarf að takast á við í þessu sambandi,“ segir Birgir.

Hann segir að ágreiningsatriðin hafi legið fyrir um langt skeið.

„Niðurstaða dómsins er auðvitað ekki bindandi að öðru leyti en því að þarna er gert ráð fyrir um það bil tveggja milljóna greiðslu í málskostnað af hálfu íslenska ríkisins en hins vegar þá finnst mér svona almennt talað að það liggi fyrir eins og raunar hefur gert um nokkurt skeið að við þurfum að fara yfir þær reglur og þau lagaákvæði sem hér á landi gilda um skipan dómara og komast að niðurstöðu með skýrum hætti um það hvar vald á að liggja og hvar ábyrgð á að liggja í þeim efnum,“ segir Birgir um valdmörk og hlutverkaskipan dómnefndar, dómsmálaráherra og Alþingis.

Hann segir að skerpa þurfi á valdmörkum.

„Það er mikilvægt að skerpa á því og raunar hygg ég að sú vinna hafi nú hafist fyrir nokkru, óháð þessum dómi í dag.“

Birgir segir að engin formleg skref verði tekin í framhaldinu en bætir við að honum finnist líklegt að niðurstaða MDE verði rædd í nefndum þingsins í dag. Þegar hann er inntur eftir viðbrögðum við ákalli til dæmis Helgu Völu um afsögn vegna málsins segir Birgir:

„Helga Vala hefur nú áður beitt sér fyrir vantrauststillögu gegn dómsmálaráðherra vegna sama máls þannig að sú afstaða Helgu Völu kemur ekkert á óvart. Það er auðvitað bara þannig að öll efnisatriði og allur ágreiningur í þessum efnum lá fyrir, fyrir ári síðan þegar stjórnarandstaðan bar fram vantrauststillögu á dómsmálaráðherra og þingið tók auðvitað afstöðu til þess á þeim tíma.“


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.