„Já. Þetta er auðvitað skoðun,“ segir Bubbi Morthens tónlistamaður og sérlegur áhugamaður um bardagaíþróttir.

Bubbi er forviða en Vísir bar undir hann pistlaskrif Hauks Arnar Birgissonar, formanns Golfsambands Íslands en þar fer hann niðrandi orðum um UFC-bardagakeppnina. Og telur vart hægt að kalla þetta íþrótt. „Ég nota gæsalappir því ég er ekki viss um að þetta sé íþrótt. Mér finnst svo margt vanta upp á, til að svo geti verið. Helst má þar nefna skort á íþróttamannslegri hegðun,“ skrifar Haukur Örn. Hvergi banginn.

Raðframhjáhaldarinn og eiturætan Tiger Woods

Bubbi telur þetta alveg galið og til marks um einhvers konar hugsunarvillu; fordóma. „Hann gæti allt eins verið að skrifa um Tiger Woods, raðframhjáhaldara, berjandi konuna sína og étandi pillur og óþverra. Og talið í framhaldi af því golfíþróttina tengjast kvenfyrirlitningu. Þetta segir sitt um hausinn á þeim sem svo skrifar, hvar hann er staddur. Jájá, MMA er ofbeldi. Það liggur fyrir. En lýtur reglum, tveir einstaklingar ákveða af fúsum og frjálsum vilja að fara inní búrið og berjast, þar sem læknir og dómari og keppt er eftir tilteknum reglum.“

Haukur Örn fer ekki fögrum orðum um MMA: „Virðingin gagnvart mótherjanum og auðmýktin gagnvart keppninni sjálfri er engin. Niðurlæging mótherjans, á sérstökum blaðamannafundum fyrir keppni, virðist hluti af handritinu. Þetta er ekkert annað en kjánalegt og á ekkert skylt við framkomu í öðrum íþróttum. Allt fyrir sjónvarpsáhorf, geri ég ráð fyrir.“

Svo ómerkilegt að það er afrek út af fyrir sig

Nú er spurt hvort þetta megi heita íþróttamannsleg hegðun af hálfu forseta Golfsambandsins, að stíga fram núna, eftir að Gunnar Nelson tapaði í London um helgina og salta í sárin? Bubbi gefur í sjálfu sér ekkert fyrir það. „Þetta er fyrirsjáanlegt. Þetta er svo auðvelt. Ég vona bara að forseta Golfsambandsins finnist hann hafa slegið holu í höggi, það hlýtur að vera draumur hvers golfara. En, þetta eru svo mikil ómerkilegheit að það er afrek út af fyrir sig.“

Bubbi segir engum blöðum um það að fletta, og í raun fáránlegt upplegg, að MMA-bardagi sé ekki íþrótt. „Sennilega ein erfiðasta íþrótt sem fyrirfinnst. Kannski sú erfiðasta. En fólk dettur í þennan pitt, finnst þetta liggja vel við höggi. Þetta er hola í höggi hjá slíkum.“
 

Golfið óttalegt dútl

En, hvað segir rokkkóngurinn þá um golfíþróttina? Margir eru þeirrar skoðunar deila megi um hvort hún geti flokkast sem íþrótt?

„Mér finnst golfíþróttin frábær íþrótt, fyrir ríka fólkið að stórum hluta og upprunalega var það þannig og hefur verið. Stunduð af gríðarlega mörgum því hún reynir bara á ákveðna hluti. Auðveld fyrir meðalskussann, erfið fyrir atvinnumanninn og allt þar á milli. Golf rúmar allan skalann og fyrir það er hún frábær.

En prívat og persónulega finnst mér golfið ekki vera íþrótt. Þetta er bara dútl.

En, það er persónuleg skoðun,“ segir Bubbi. Og skoðun sem hann er ekki að flagga sérstaklega nema þegar honum er stillt upp við vegg. Eins og nú, af blaðamanni Vísis.

„Ég fer í mínigolf og svona, en mér hefur aldrei fundist þetta vera íþrótt. En, ég hef enga fordóma út í golf. Mér finnst það frábært. Þar geta allir labbað um með kylfuna sína í góðu veðri, jájá, bara alveg frábært.“