Innlent

Miðflokksmenn sagðir hefna þess á Alþingi sem hallaðist í héraði

Jakob Bjarnar skrifar
Nokkrir færustu pennar landsins hafa dregið fram stílvopnin og beita þeim óspart á Miðflokksmenn eftir málþóf næturinnar.
Nokkrir færustu pennar landsins hafa dregið fram stílvopnin og beita þeim óspart á Miðflokksmenn eftir málþóf næturinnar.

Málþóf Miðflokksmanna í nótt, sem stóð í heila 14 tíma og lauk klukkan hálf sex í morgun, hefur líklega orðið til þess að þjappa hinum nýja þingflokki saman. En hvort það hafi orðið til að auka virðingu fyrir Miðflokknum, sem á undir högg að sækja í þeim efnum vegna Klausturmála, er spurning. Svarið við þeirri spurningu er: Ekki. Ekki, ef marka má viðbrögð á samfélagsmiðlum, ekki ef marka má pistil Guðmundar Andra Thorssonar þingmanns á Facebook, sem mikið er til vitnað á samfélagsmiðlinum. Reyndar eru þeir nokkrir færir pennar sem draga fram stílvopn sín og nota þau óspart á Miðflokksmennina.

„Í gær átti sér stað nokkurs konar gíslataka á ræðustól Alþingis. Níu manna þingflokkur hélt árshátíð sína þarna í ræðustólnum með því að yfirtaka hann og sýna þingheimi fram á að nú sé flokkurinn aldeilis búinn að ná vopnum sínum. Sem eru ræðuhöld. Stóð gleðin til að verða hálfsex um morguninn.“

Sigmundur einn manna skilur málið

Þannig hefst pistill Guðmundar Andra en hann vitnar í Pál Vídalín sem orti um alræmdan valdadrykkjurút: „Þú hefnir þess í héraði sem hallaðist á Alþingi.“

Guðmundur Andri Thorsson, þingmaður Samfylkingarinnar, hefur ritað pistil á Facebook um málþóf Miðflokksmanna og hefur hann vakið mikla athygli.

Nema, hér hefur þetta snúist við að mati Guðmundar Andra. Nú er þess hefnt á Alþingi sem hallaðist í héraði. Guðmundur Andri hleypur yfir það sem honum sýnist málið snúast um:

„Sigmundur Davíð Gunnlaugsson situr í Efnahags- og viðskiptanefnd og hann var ekki mættur þegar málið sem til umræðu er var afgreitt. Hann skilaði ekki heldur séráliti. Hann er hins vegar reiðubúinn að setja þingstörfin í uppnám til að koma sjónarmiðum sínum á framfæri, enda búinn að sjá þetta allt út, einn manna.“

„Fríkin fríka út“

Guðmundur Andri segir þetta ekki snúast um skýra valkosti, eins og stundum hefur verið þegar upp hefst málþóf: „Þetta er eitthvað annað: virðist snúast um einhvers konar hópefli fólks sem glatað hefur virðingu annarra og ætlar að hrifsa hana til sín aftur með ofríki.“

Fjölmargir hafa orðið til að vitna í pistil Guðmundar Andra. Annar pistill, sem Karl Th. Birgisson ritar á vef sinn Herðubreið, hefur einnig vakið athygli í þessu samhengi. Karl hefur hina mestu skömm á framgöngu Miðflokksmanna og það hefur Illugi Jökulsson rithöfundur einnig sem tengir við pistil Karls á sinni Facebook-síðu og fylgir honum úr hlaði með orðunum:

Páll Valsson, útgefandi, er einn þeirra sem lætur Miðflokksmenn finna fyrir stilvopnum sínum. VISIR

„Karl Th Birgisson kveðst vera of vel uppalinn til að nota fyrirsögnina „Fríkin fríka út“ um framgang Miðflokksins í málþófi í gær. Ég er líka mjög vel upp alinn en mundi hafa valið þessari nöturlegu uppákomu fyrirsögnina „Dónar sýna eðli sitt“.“

Ógæfa yfir íslenskum stjórnmálum

Páll Valsson útgefandi er hjartanlega sammála þeim Guðmundi Andra, Karli Th. og Illuga: „Miðflokkurinn hrynur í fylgi, maklega bak Klausturmálum, en stóreflist þá að þingstyrk, og er nú lagstur í málþóf og talar um Icesave - hvaða jörmunógæfa hvílir yfir íslenskum stjórnmálum?“

Kolbeinn Óttarsson Proppé, er einn fárra þingmanna sem sat yfir allri umræðunni og greinir hann frá því á Facebooksíðu sinni: „Næturfundi lokið, nú held ég heim. Þingfundi lauk fyrir skömmu, klukkan 5.21. Ég hlustaði á margar ræður frá fólki sem er allt í sama flokknum. Það hafði miklar skoðanir á vilja og innræti annarra þingmanna, en engar efasemdir um eigið ágæti. Vissulega lærdómsríkt.“
 

Björn Ingi útskýrir málið að hætti hússins

En, þó þeir séu talsvert fleiri sem eru til í að fordæma framgöngu Miðflokksmanna á þingi í nótt, þá eiga þeir hauk í horni sem er Björn Ingi Hrafnsson ritstjóri. Hann fer yfir málin á sinni Facebook-síðu og með leyfi fundarstjóra, þá hlýtur þetta að teljast skilmerkileg yfirferð:

Björn Ingi Hrafnsson má heita sérfróður um Miðflokkinn og nýtir reynslu sína sem þingfréttamaður til að útskýra málið. Fréttablaðið/Valli

„Einhverjir undrast langar ræður Miðflokksfólks um haftamál í þinginu í dag. Sem gamall þingfréttaritari Moggans held ég að skýringin sé einföld:

1. Flokkurinn er á móti málinu, Sigmundur Davíð hefur margoft lýst því að hann telji með því gefið eftir gagnvart vogunarsjóðum.

2. Þetta er kjörið tækifæri fyrir flokkinn til að þétta raðirnar og sýna samstöðu.

3. Með þessu sýnir hann að svo stór þingflokkur er fullfær um að vera einn í stjórnarandstöðu ef þarf.

4. Þetta markar ákveðna stöðu gagnvart stjórnarflokkunum og hinum stjórnarandstöðuflokkunum.

Skilaboðin eru þau, að ekkert samkomulag er um þingstörf ef Miðflokkurinn er virtur að vettugi.

Þannig skil ég þetta að minnsta kosti.“


Tengdar fréttir

Þingfundi slitið í morgun eftir 14 tíma málþóf

Eftir rúmlega fjórtán klukkustunda langt málþóf þingmanna Miðflokksins um meðferð krónueigna sem háðar eru sérstökum takmörkunum og gjaldeyrismál bauð forseti Alþingis þeim að halda umræðunum áfram þegar þingið kemur saman síðar í dag.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.