Innlent

Arnarlax 20 milljarða virði 6 árum eftir að Matthías mætti á Bíldudal

Kristján Már Unnarsson skrifar
Matthías Garðarsson, stofnandi Arnarlax, í viðtali á æskuslóðum á Bíldudal vorið 2013.
Matthías Garðarsson, stofnandi Arnarlax, í viðtali á æskuslóðum á Bíldudal vorið 2013. Mynd/Egill Aðalsteinsson.
Arnarlax er komið í flokk verðmætustu fyrirtækja landsins og telst yfir tuttugu milljarða króna virði, miðað við yfirtökutilboð sem norska félagið Salmar þarf að gera öðrum eigendum Arnarlax. Þetta kom fram í fréttum Stöðvar 2. 

Það eru ekki nema sex ár frá því Matthías Garðarsson mætti frá Noregi til Bíldudals til að hefja uppbyggingu Arnarlax. Hann lýsti þá þeim draumi sínum að endurreisa sína gömlu heimabyggð, en íbúum Bíldudals hafði fækkað um tvo þriðju frá því hann var að alast þar upp.

Frá sjókvíum Arnarlax í Arnarfirði.Stöð 2/Egill Aðalsteinsson,
„Ekki bara hérna á Bíldudal. Það eru möguleikar um alla Vestfirði til þess að nota þessar auðlindir í fjörðunum til þess að byggja upp laxeldi. Við erum að tala um mörghundruð störf, bara miðað við hráefni úr þessum firði, þegar hann verður nýttur," sagði Matthías í fréttum Stöðvar 2 vorið 2013. 

Árið 2014 fékk Matthías norska félagið Salmar inn í hluthafahópinn, síðar sameinuðust Arnarlax og Fjarðalax, og í dag var tilkynnt um að Salmar hefði keypt hluti Fiskisunds og TM, sem áður áttu Fjarðalax. Við þetta eignast Salmar hreinan meirihluta og kaupskylda skapast gagnvart öðrum hluthöfum Arnarlax, sem eru um 40 talsins.

Frá komu fóðurpramma Arnarlax til Tálknafjarðar vorið 2017.Stöð 2/Egill Aðalsteinsson.
„Þessi einstöku viðskipti þarna setja verðmiða á Arnarlax sem er rétt um 20 milljarðar, 21 milljarður,“ segir Kjartan Ólafsson, stjórnarformaður Arnarlax. 

Þetta þýðir að Arnarlax telst nú álíka verðmætt og HB Grandi og Icelandair telst bara tvöfalt verðmætara en Arnarlax. Salmar er eitt stærsta laxeldisfyrirtæki heims en Kjartan segir að eignarhald þess í Arnarlaxi skapi stöðugleika.

Kjartan Ólafsson, stjórnarformaður Arnarlax.Stöð 2/Friðrik Þór Halldórsson.
„Þeir hafa komið með það fjármagn sem hefur þurft og þetta er mjög fjármagnsfrekur bransi. Þannig að fyrir samfélögin, sveitarfélögin, starfsmenn og alla hlutaðeigandi í Arnarlax þá eru þetta í sjálfu sér bara jákvæðar fréttir,“ segir Kjartan. 

Fjárfesting í fiskeldi á Vestfjörðum hefur raunar verið gríðarleg á undanförnum árum, eins sjá mátti dæmi um fyrir tveimur árum þegar Arnarlax fékk fullkomnasta fóðurpramma landsins, og sýnt var frá í beinni útsendingu Stöðvar 2.

Hátíð var Tálknafirði þegar stærsti fóðurprammi landsins kom þangað fyrir tveimur árum.Stöð 2/Egill Aðalsteinsson.
„Undanfarin örfá ár lætur nærri að búið sé að fjárfesta fyrir rétt um þrjátíu milljörðum á Vestfjörðum í uppbyggingu greinarinnar. Þetta eru auðvitað gríðarlegar upphæðir úr einkaframtakinu.

Arnarlax fékk núna um áramótin ASC-vottun, sem er mikil viðurkenning fyrir lítið fiskeldisfyrirtæki,“ segir stjórnarformaðurinn.

Fóðurprammi Arnarlax við kvíar á Arnarfirði.Stöð 2/Egill Aðalsteinsson.
Um gagnrýni á erlent eignarhald kveðst Kjartan telja ótvírætt að það sé jákvætt að traustir aðilar standi að þessu. Salmar sé skráð almenningshlutafélag. 

„Og ég held að það hljóti að vera mjög jákvætt, fyrir samfélögin og starfsmenn, að að þessum félögum, að þessari uppbyggingu, standi traustir og ábyggilegir aðilar, - hverrar þjóðar sem þeir svo eru.“

Hér má sjá frétt Stöðvar 2:


Tengdar fréttir

Matthías mættur til að skapa 150 störf á Bíldudal

Laxeldi stefnir í að valda byltingu á Vestfjörðum á næstu árum og skapa mörghundruð störf. Matthías Garðarsson, fiskeldisfrömuður í Noregi, kom til landsins fyrir helgi til að byggja upp 150 manna fyrirtæki á Bíldudal.

Laxeldi á Vestfjörðum eins og ígildi álvers

Uppbygging laxeldis stefnir í að hafa sambærileg og jafnvel meiri áhrif á sunnanverðum Vestfjörðum og stóriðjuframkvæmdirnar höfðu fyrir Austurland, segir bæjarstjóri Vesturbyggðar.




Fleiri fréttir

Sjá meira


×