Laxabitaverksmiðjunni skipað upp á Bíldudal

Flutningaskip er komið til Bíldudals með fiskréttaverksmiðju frá Noregi sem verður meginþáttur 150 nýrra starfa Arnarlax á sunnanverðum Vestfjörðum. Um borð í flutningaskipinu Hauki eru 200 tonn af tækjum og vélarhlutum. Aðaleigandi Arnarlax, Bílddælingurinn Matthías Garðarsson, er að flytja laxabitaverksmiðju, sem hann byggði upp í Norður-Noregi, í heilu lagi inn í sitt gamla byggðarlag við Arnarfjörð.

Á Hálogalandi í Noregi störfuðu eitthundrað manns í verksmiðjunni við að fullvinna laxabita í neytendaumbúðir fyrir Evrópumarkað og það sama er ætlunin að gera á Bíldudal. Framundan er að reisa nýtt verksmiðjuhús á uppfyllingu í útjaðri þorpsins en Arnarlax er þegar kominn með fyrstu kynslóð laxa í eldi í kvíum á Arnarfirði.

Matthías segir að fyrirtækið sé þegar komið með leyfi fyrir 3.000 tonna laxeldi en beðið sé eftir leyfi fyrir 10.000 tonnum, sem er forsendan fyrir hráefnisöflun í matvælaframleiðsluna. Ekki sé ráðlegt að byggja nýja verksmiðju fyrr en leyfið sé í höfn en hann vonast til að það fáist í kringum næstu áramót. Framkvæmdir á nýju lóðinni geti þá farið á fullt í vor.

Í viðtali í fréttum Stöðvar 2 segir Matthías að fáist leyfi fyrir 10.000 tonna laxeldi þýði það 150 störf hjá Arnarlaxi; í verksmiðjunni, við sjókvíaeldið og við seiðaeldisstöð fyrirtækisins. Hann var sjálfur á lyftaranum að aka vélarhlutunum inn í hús þar sem þeim verður komið fyrir til bráðabirgða en hjá Arnarlaxi starfa þegar milli 20 og 25 manns.

„Það er auðséð að okkar innkoma hér á Bíldudal hefur haft feiknarlega mikið að segja. Það er búið að flytja hingað hellingur af fólki í sumar, fjölskyldur, og ungt fólk komið í skólann. Það er tekið eftir þessu. Þannig að hér er mikil bjartsýni," segir Matthías.