Tíu stig frá Martin í öruggum sigri

Martin Hermannsson átti enn einn flotta leikinn fyrir Alba Berlín sem vann í kvöld átján stiga sigur, 86-68, á Medi Bayreuth á heimavelli í kvöld.

Jafnræði var með liðunum í fyrri hálfleik og var staðan 39-38 fyrir gestunum í hálfleik. Martin og félagar stigu á bensíngjöfina í þriðja leikhluta, unnu hann 22-11 og leikinn að lokum, 86-68.

Martin skoraði tíu stig á hálftímanum sem hann spilaði. Að auki gaf hann þrjár stoðsendingar en Alba var +21 með Martin inni á vellinum. Mikilvægi hans mikið fyrir Berlínarliðið.

Alba er með sigrinum komið upp að hlið Oldenburg í þriðja sæti deildarinnar en bæði lið eru með þrettán stiga í fyrstu sautján leikjunum. Bayern er á toppnum með fullt hús stiga.