Innlent

Fullyrðingar Sigmundar um brot á þingskaparlögum standast ekki

Þorbjörn Þórðarson skrifar
Steingrímur J. Sigfússon forseti Alþingis og Sigmundur Davíð Gunnlaugsson formaður Miðflokksins. Sigmundur virðist líta svo á að kosning nýrrar forsætisnefndar Alþingis til að fjalla um Klaustursmálið beinist gegn sér persónulega og sé einhvers konar hefndarleiðangur Steingríms.
Steingrímur J. Sigfússon forseti Alþingis og Sigmundur Davíð Gunnlaugsson formaður Miðflokksins. Sigmundur virðist líta svo á að kosning nýrrar forsætisnefndar Alþingis til að fjalla um Klaustursmálið beinist gegn sér persónulega og sé einhvers konar hefndarleiðangur Steingríms.
Sigmundur Davíð Gunnlaugsson, formaður Miðflokksins, telur kosningu nýrrar forsætisnefndar Alþingis til að fjalla um Klaustursmálið stangast á við lög um þingsköp á „víðtækan hátt.“ Til stendur að kjósa forsætisnefndina þegar leitað hefur verið afbrigða eins og skýr heimild er fyrir í þingskaparlögum.

Aðeins sex þingmenn af sextíu og þremur eru metnir hæfir til þess að koma Klaustursmálinu áfram til siðanefndar Alþingis. Af þessum sökum verður kosin ný forsætisnefnd sem hefur það eina verkefni að fjalla um Klaustursmálið og vísa því áfram til siðanefndar Alþingis.

Sigmundur Davíð Gunnlaugsson skrifar grein í Morgunblaðið í dag undir fyrirsögninni „Misnotkun Alþingis“ þar sem hann fjallar um þetta fyrirkomulag á afgreiðslu málsins. „Niðurstaðan var sú að 3-6 þingmenn kæmu til greina og forsetinn hófst handa við að reyna að skikka þá í hlutverkið. Að minnsta kosti einn þeirra sagðist strax ekki ætla að láta leiða sig út í ógöngur forsetans og þá voru eftir tveir (eða fimm). Þetta stangast á við lög um þingsköp á svo víðtækan hátt að hægt væri að skrifa heila grein bara um það,“ segir Sigmundur í greininni. 

Þá fjallar hann um störf siðanefndar Alþingis og segir að öllum megi vera ljóst að sérstök undirnefnd vanhæfrar forsætisnefndar sé sjálf vanhæf. „(T)elst siðanefndin vanhæf, verandi undirnefnd forsætisnefndar. Öllum má þá vera ljóst að sérstök undirnefnd vanhæfrar forsætisnefndar valin af vanhæfu fólki í trássi við lög til að afgreiða mál með fyrir fram ákveðnum hætti væri sjálf vanhæf,“ segir Sigmundur. 

Sigmundur segir að með framferði sínu brjóti Steingrímur J. Sigfússon, forseti Alþingis, blað í sögu þingsins. Þá gefur Sigmundur í skyn í greininni að þessi afgreiðsla málsins beinist gegn sér persónulega og að Steingrímur leitist við að nýta stöðu sína sem forseti Alþingis til að hefna sín á sér. „Viðhorf Steingríms til mín er vel þekkt. Hann telur sig eiga harma að hefna og leitast nú við að nýta stöðu sína í þeim tilgangi,“ segir Sigmundur í greininni. 

Eins og rakið er framar virðist Sigmundur líta svo á að kosning sérstakrar forsætisnefndar Alþingis gangi í berhögg við þingskaparlög. Í 3. gr. þingskaparlaga kemur fram að kosinn er forseti og svo sex varaforsetar Alþingis. Saman mynda þeir forsætisnefnd þingsins. Í þingskaparlögum er síðan heimild til að leita svokallaðra afbrigða en hún kemur fram í 94. gr. þingskaparlaga. Þar segir: „Eftir uppástungu forseta eða formanns þingflokks má bregða út af þingsköpum þessum ef tveir þriðju hlutar þeirra þingmanna, er um það greiða atkvæði, samþykkja.“ Samkvæmt upplýsingum fréttastofunnar verður ný forsætisnefnd til að fjalla um Klaustursmálið kosin á grundvelli þessarar heimildar. Þá þurfa tveir þriðju hlutar þeirra þingmanna sem greiða atkvæði að samþykkja að veitt sé afbrigði. Þegar það liggur fyrir er hægt að kjósa nýja forsætisnefnd. Að þessu virtu er ljóst að fullyrðing um að kosning nýrrar forsætisnefndar Alþingis brjóti í bága við þingskaparlög stenst ekki.

Sigmundur virðist telja að siðanefnd Alþingis sé undirnefnd forsætisnefndar eins og rakið er framar. Undirnefndir þingsins eru yfirleitt skipaðir fulltrúum þeirrar nefndar sem viðkomandi undirnefnd heyrir undir. Til dæmis starfar sérstök undirnefnd undir allsherjarnefnd sem hefur það verkefni að fjalla um umsóknir um ríkisborgararétt og er hún skipuð þingmönnum sem sitja einnig í allsherjarnefnd. Siðanefnd Alþingis er hins vegar sjálfstæð nefnd sem tekur til umfjöllunar erindi frá forsætisnefnd um meint brot á siðareglum alþingismanna. Nefndin var skipuð í febrúar 2017 og enginn sitjandi nefndarmanna er alþingismaður. Nefndin telst því ekki vera undirnefnd forsætisnefndar Alþingis í venjubundnum skilningi og hæfi nefndarmanna tengist því ekki hæfi forsætisnefndar á neinn hátt. Ekki verður því betur séð en að þessi fullyrðing Sigmundar um vanhæfi siðanefndarinnar sé einnig röng.

Ekki náðist í Sigmund við vinnslu fréttarinnar til að fá viðbrögð hans við efni hennar.


Tengdar fréttir

Formenn skiptust á skotum um Klaustursmálið

Kryddsíldin 2018 hófst á því að Sigmundur Davíð Gunnlaugsson, formaður Miðflokksins, sagðist hafa átt fjölda sambærilegra funda og þann sem tekinn var upp á Klaustur Bar í síðasta mánuði.

Segist læra af Klausturs­málinu með því að sitja á­fram á þingi

Anna Kolbrún Árnadóttir, þingmaður Miðflokksins og einn sexmenninganna sem sátu á Klaustur bar þann 20. nóvember síðastliðinn og töluðu á óviðeigandi hátt meðal annars um samþingmenn sína, segir að sér finnist það ekki skrýtið að fólk vilji að hún segi af sér þingmennsku vegna málsins.

Stjórn tók fyrir Klaustursmál

Þingmenn Miðflokksins, sem sátu að sumbli á Klausturbar, réðu sér lögmann sem meðal annars sendi Persónuvernd erindi vegna upptökunnar.

Forsætisnefnd lýsir sig vanhæfa í Klaustursmálinu

Allir þeir þingmenn sem eiga sæti í forsætisnefnd hafa metið sig vanhæfa til þess að fjalla um Klaustursmálið. Þetta kemur fram í fréttatilkynningu frá forseta Alþingis sem send var á fjölmiðla í dag. Vísir fjallaði fyrr í dag um að nokkrir nefndarmenn hefðu þegar sagt sig frá málinu.




Fleiri fréttir

Sjá meira


×