Frá lagningu Dettifossvegar um Ásheiði sumarið 2016. Séð norður til Kelduhverfis og Öxarfjarðar.Stöð 2/Friðrik Þór Halldórsson.
Meira en áratug eftir að framkvæmdir hófust sér loksins fyrir endann á lagningu nýs Dettifossvegar. Tilboð í gerð síðasta áfangans hafa nú verið opnuð hjá Vegagerðinni og er reiknað með verklokum eftir tvö ár. Sagt var frá tilboðunum í frétt Stöðvar 2.
Gerð nýs Dettifossvegar hófst árið 2008 og voru þá vonir bundnar við að lagningu þessa 55 kílómetra vegar myndi ljúka á nokkrum árum. Fyrsti áfanginn var frá hringveginum um Mývatnsöræfi að Dettifossi en með honum varð vesturbakkinn helsta aðkomuleið ferðamanna að fossinum í stað austurbakkans.
Frá gerð fyrsta áfangans árið 2009, sem var 25 kílómetra kafli frá hringveginum um Mývatnsöræfi að Dettifossi. Herðubreið við sjóndeildarhringinn til vinstri.Stöð 2/Sigurjón Ólason.Framhald verksins lenti hins vegar reglulega í niðurskurði og sumarið 2016 var helmingur vegarins ennþá niðurgrafinn moldarslóði. Fyrir ferðaþjónustu í Norður-Þingeyjarsýslu var hálfur Dettifossvegur sagður verri en enginn en fleiri áfangar hafa síðan bæst við frá árinu 2014.
Og núna er loksins komið að því að ljúka tengingunni norður í Ásbyrgi og einnig þeim köflum sem greiða leið ferðamanna að fleiri náttúruperlum í Jökulsárgljúfrum, eins og Hólmatungum, Vesturdal og Hljóðaklettum.
Dettifossvegur er ennþá mjór, niðurgrafinn moldarslóði á löngum kafla milli Ásbyrgis, Hljóðakletta og Dettifoss.Mynd/Friðrik Þór Halldórsson.Tilboð í lokaáfangana hafa nú verið opnuð en kostnaðaráætlun Vegagerðarinnar hljóðaði upp á 850 milljónir króna. Aðeins bárust tvö tilboð; frá G. Hjálmarssyni á Akureyri upp á 902 milljónir króna, sex prósent yfir kostnaðaráætlun, og frá Þ.S. verktökum á Egilsstöðum, upp á 987 milljónir króna, eða 16 prósent yfir áætlun.
Tvö tilboð bárust í verkið.Grafík/Hafsteinn Þórðarson.Í verkinu felst að leggja burðarlag og klæðingu á 7,2 km kafla á Dettifossvegi ofan Vesturdals, sem byggður var upp í fyrra, og byggja nýjan 4,2 km langan veg neðan Vesturdals.
Ennfremur að leggja þrjá nýja tengivegi út frá Dettifossvegi; 2,7 km langan veg niður í Hólmatungur, 1,6 km langan veg niður í Vesturdal og 1,5 km langan veg upp á Langavatnshöfða. Auk þess skal gera nokkra áningarstaði.
Demantshringurinn svokallaði verður loksins boðlegur valkostur fyrir ferðamenn á venjulegum fólksbílum þegar uppbyggingu Dettifossvegar lýkur.Grafík/Vísir.Líklegt má telja að Vegagerðin gangi til viðræðna við lægstbjóðanda, G. Hjálmarsson, en verktakinn sá meðal annars um stærsta hluta jarðvinnu í kringum Þeistareykjavirkjun.
Samkvæmt upplýsingum Hauks Jónssonar, deildarstjóra Vegagerðarinnar á Norðursvæði Vegagerðarinnar er reiknað með verklokum árið 2021.
Ferðaþjónustuaðilar á norðausturhorni landsins óttast hrun, þegar bara hálfur Dettifossvegur verður opnaður meðfram Jökulsárgljúfrum næsta sumar, og segja að ferðamennirnir muni sleppa Ásbyrgi og byggðunum við norðurströndina.
Setja á aukinn kraft í að markaðssetja Demantshringinn svokallaða á Norðurlandi. Forsenda þess er að Dettifossvegur verði uppbyggður og fær öllum bílum yfir vetrartímann.
