„Ég sá ljósið í gegnum svartasta myrkrið“

„Ég er að fara halda námskeið sem hefur það markmið að hjálpa komum að styrkja sjálfsímynd sína, að forðast að láta neikvæða gagnrýni hafa áhrif á þær og byggja upp sitt sjálfstraust,“ segir Maria Jimenez Pacifico sem stendur fyrir námskeiðinu Ég fagna mér þann 3. janúar.

Maria er fædd í Kólumbíu en hefur búið á Íslandi síðastliðin fimmtán ár.

„Ég hef unnið sem plus size fyrirsæta á alþjóðavísu í tíu ár, en á sama tíma hef ég verið mjög virk í opinberri umræðu gegn einelti í skólum og kynferðisofbeldi. Ég hef barist gegn staðalímyndum um útlit og hef staðið fyrir réttindum, frelsi og hamingju kvenna.“

Maria hefur víða komið við í erlendum fjölmiðlum og hefur til að mynda CNN  og The Independent fjallað um hennar reynslu.

„Þetta er mér mjög mikilvæg umræða vegna þess að ég hef sjálf lent í einelti og stóð það yfir í mörg ár. Og ég hef orðið fyrir kynferðisofbeldi. Ég hef fundið kjark til að láta þessar hrikalegu lífsreynslur ekki eyðileggja sjálfsímynd mína og hef í rauninni fundið bestu og sterkustu útgáfuna af sjálfri mér í gegnum þetta ferli, ég sá ljósið í gegnum svartasta myrkrið.“

Maria segir að hugmyndin um námskeiðið hafi kviknað vegna umræðu á samfélagsmiðlum.

„Ég er margoft spurð á samfélagsmiðlunum um hvernig ég hef unnið mig í gegnum eineltið á skólaárunum og hvernig ég hef breytt neikvæðum lífsreynslur í jákvætt viðhorf. Margar eru að velta því fyrir sér hvaðan ég fæ sjálfstraustið sem kona í yfirstærð. Ég hef aðstoðað konur út um allan heim að finna sinn innri styrk og hef gefið þeim tæki og tól til að verða jákvæðar, sterkar og sjálfsöruggar.“

Fjallað var um Mariu í þættinum Íslandi í dag árið 2014 en þá sagði Maria, þá 24 ára gömul, sögu sína.

Árið 2011 hélt hún ásamt vinkonu sinni í miðbæ Reykjavíkur til að skemmta sér. 

Sú skemmtun breyttist fljótt í martröð því hún vaknaði upp við það að ókunnugur maður var að nauðga henni.

Hún segir að markhópurinn sé fyrst og fremst ungar konur sem hafa átt við vandamál að stríða með sjálfsímynd og traust.

„En ég vil hjálpa þeim að líða betur og sýna þeim leiðina til að skína innan frá. Með tækni úr sálfræði, leiklist og fyrirsætubransanum vil ég hjálpa konum að bæta sína framkomu og að temja sér að vera jákvæðar og öruggar í öllum aðstæðum.“

Hér má kynna sér meira um námskeiðið og hér er hægt að fylgjast með Mariu á Instagram.