Arna Stefanía Guðmundsdóttir, FH, er nýr norðurlandameistari í 400 metra hlaupi.

Náði hún þessum glæsilega árangri í Uppsala í Svíþjóð í dag þar sem norðurlandameistaramótið í frjálsum íþróttum fór fram.

Hljóp hún á tímanum 54,33 sekúndum sem er hennar besti tími á tímabilinu og er það jafnframt hennar þriðji besti tími frá upphafi.

Josefin Magnusson frá Svíþjóð hafnaði í 2. sæti á tímanum 54,77 sek og Moa Hjelmer frá Svíþjóð í 3. sæti á 54, 84 sek. 

Liðsfélagi Örnu úr FH, Þórdís Eva Steinsdóttir, keppti einnig í 400 m hlaupi á mótinu. Hafnaði hún í 6. sæti eftir að hafa hlupið á tímanum 56,10 sek sem er hennar besti tími á tímabilinu.

Níu aðrir íslenskir íþróttamenn kepptu á mótinu og má sjá árangur þeirra hér að neðan.



Hulda Þorsteinsdóttir ÍR hafnaði í 3. sæti í stangarstökki er hún stökk yfir 4,24 m í fyrstu tilraun. Þetta er jafnframt besti árangur Huldu á tímabilinu. 

Ívar Kristinn Jasonarson ÍR hafnaði í 7. sæti í 400 m hlaupi á tímanum 49,58 sekúndum.

Einar Daði Lárusson ÍR hafnaði í 7. sæti í 60 m grindahlaupi er hann hljóp á tímanum 8,46 sekúndum.

Bjarki Gíslason KFA hafnaði í 8. sæti í stangarstökki er hann stökk yfir 4,86 m í fyrstu tilraun.

Kristinn Torfason FH hafnaði í 8. sæti í langstökki er hann stökk 6,93 m.

Guðni Valur Guðnason ÍR hafnaði í 8. sæti í kúluvarpi er hann varpaði kúlunni 16,36 m.

Tiana Ósk Whitworth ÍR hafnaði í 8. sæti í 60 m hlaupi er hún hljóp á tímanum 7,65 sek.

Þóranna Ósk Sigurjónsdóttir UMSS hafnaði í 7. sæti ásamt Tina Bischoff Gellin frá Danmörku er hún stökk yfir 1,73 m.

Irma Gunnarsdóttir Breiðabliki hafnaði í 7. sæti í langstökki er hún stökk 5,66 m.