Hættulegt ferðaveður undir Eyjafjöllum í fyrramálið

Hættulegt ferðaveður verður undir Eyjafjöllum í fyrramálið. Veðurstofa Íslands hefur varað við norðaustan roki á Suður- og Suðausturlandi frá klukkan fimm til hádegis á morgun. Er búist við austan og norðaustan 23 til 30 metrum á sekúndu frá Hvolsvelli og austur með Eyjafjöllum en norðaustan 15 til 23 metrum á sekúndu vestan til á svæðinu. 

Mjög snarpar vindhviður verða undir Eyjafjöllum og hætta á foktjóni. Verður takmarkað skyggni í ofankomu og skafrenningi á svæðinu. 

Búist er við norðaustan stormi á Faxaflóa, 18 til 25 metrum á sekúndu, og mjög snörpum vindhviðum við fjöll, og er Kjalarnes og Hafnarfjall nefnt sérstaklega í viðvörun Veðurstofu. Lélegt skyggni verður í skafrenningi, einkum á fjallvegum og eru ferðalangar beðnir um að sýna aðgát. 

Allt landið er í raun undir, gul viðvörun gildir í öllum landsfjórðungum á morgun nema á Suður- og Suðausturlandi þar sem appelsínugul viðvörun verður í gildi. Það mun því hvessa í nótt, austan og norðaustan 15-25 á morgun, en 25-30 syðst á landinu. Lægir eftir hádegi sunnanlands, síðar einnig í öðrum landshlutum, allvíða austan 8-15 undir kvöld. Snjókoma, slydda eða rigning um allt land, einkum á austanverðu landinu. Hiti um og yfir frostmarki síðdegis.

Veðurhorfur á landinu næstu daga:

Á fimmtudag:

Norðaustan 8-15 m/s á Vestfjörðum, annars austlæg eða breytileg átt 3-10. Skúrir eða él, en lengst af þurrt suðvestantil á landinu. Víða frostlaust við ströndina, en vægt frost til landsins.

Á föstudag og laugardag:

Suðvestan 8-13 m/s og él, en hægari vindur og bjartviðri á N- og A-landi. Hiti rétt ofan frostmarks við S- og V-ströndina, annars frost 1 til 7 stig.

Á sunnudag:

Sunnanátt með snjókomu og síðar slyddu eða rigningu. Hlýnandi veður.

Á mánudag:

Sunnanátt með rigningu eða súld, en þurrt á Norður- og Austurlandi. Hiti 5 til 10 stig.

Á þriðjudag:

Snýst í suðvestanátt með skúrum og síðar éljum og kólnandi veðri. Þurrt norðaustantil á landinu.