Rússneskar systur grunaðar um morð á ofbeldisfullum föður

Lögregla í Rússlandi er með þrjár systur á táningsaldri í haldi vegna gruns um að hafa stungið föður sinn til bana í íbúð sinni í höfuðborginni Moskvu.

Khachaturyan systurnar eru sautján, átján og nítján ára gamlar hafa játað verknaðinn, að því er fram kemur í rússneskum fjölmiðlum.

Í frétt BBC segir að systurnar segi föðurinn Mikhail hafa komið í veg fyrir að þær gætu stundað nám, haldið þeim sem þrælum og ógnað þeim með skotvopnum.

Systurnar hafa verið úrskurðaðar í gæsluvarðhald til 28. september en lík Mikhail Khachaturyan fannst 27. júlí síðstliðinn. 

Hinn 57 ára faðir stúlknanna var með um fjörutíu stungusár, en lík hans fannst á gangi íbúðabyggingar þar sem fjölskyldan bjó.

Lögregla telur að hin sautján ára Maria hafi stungið föður sinn um 35 sinnum á meðan systur hennar, Angelina og Kristina – börðu í höfuð hans með hamri og sprautuðu piparúða í andlit hans.

Að sögn BBC gætu systurnar átt yfir höfði sér langa fangelsisdóma, en þó ekki lífstíðardóma. Yngsta systirin gæti að hámarki átt yfir höfði sér tíu ára dóm.