Innlent

Getur reynst flókið að leysa úr yfirráðum yfir þingflokki Flokks fólksins

Heimir Már Pétursson skrifar
Inga Sæland, formaður Flokks fólksins.
Inga Sæland, formaður Flokks fólksins. Vísir/Vilhelm

Það getur reynst flókið að leysa úr því hverjir sitja að lokum áfram í núverandi þingflokki Flokks fólksins. Þótt bæði formaður og varaformaður þingflokksins hafi verið reknir úr flokknum eru þeir enn í þingflokknum. Inga Sæland segist hafa bæði stjórn og almenna flokksmenn á bakvið sig í baráttunni fyrir bættu siðferði í íslenskum stjórnmálum.

Samþykkt var með átta atkvæðum af níu í stjórn Flokks fólksins í gær að vísa Ólafi Ísleifssyni formanni þingflokks og Karli Gauta Hjaltasyni varaformanni þingflokksins úr flokknum. Níundi stjórnarmaðurinn, Karl Gauti, mætti ekki á stjórnarfundinn enda telja hann og Ólafur að ólöglega hafi verið boðað til fundarins. Inga Sæland formaður flokksins og vísar því aftur á móti á bug.

Það er í sjálfu sér er einstakur viðburður í íslenskri stjórnmálasögu að tveir þingmenn séu reknir úr flokkum sínum. Hins vegar eru þeir Ólafur og Karl Gauti enn í þingflokki Flokks fólksins þótt ekki fari milli mála að formaður flokksins, stjórn flokksins og Guðmundur Ingi Kristinsson þingmaður vilja þá tvímenninga úr þingflokknum.

„Flokkur fólksins vill betra siðferði inni á þingi og við tökum ábyrgð á okkar gerðum. Og það er nákvæmlega það sem við erum að gera nú,” segir Inga.

En svona fyrir utan stjórnina eruð þið að heyra almennt í fólki í flokknum, hvernig er hljóðið í hinum almenna flokksmanni?

„Í rauninni myndi ég segja að hljóðið í hinum almenna flokksmanni, stjórninni og öllum sem að þessu koma er þannig að ég get ekki annað en staðið keik í brúnni og barist með oddi og egg fyrir fyrir réttlæti og bættu siðferði. Ég er bara með gríðarlega góðan stuðning og yndislegt fólk allt í kring,” segir Inga.

Þrátt fyrir þetta er ekki víst að það verði síðan einfalt að leysa úr málum fjögurra manna þingflokks þar sem þrjá þingmenn þarf til að mynda nýjan þingflokk á Alþingi. Þar sem þingflokkur Flokks fólksins uppfyllti þau skilyrði að loknum kosningum segir Helgi Bernódusson skrifstofustjóri Alþingis að hann geti verið það áfram. Spurningin er hver ræður þeim þingflokki?

Karl Gauti segir stjórn flokksins hafa lögsögu yfir flokknum sjálfum.

„Þau geta vísað okkur úr flokknum eins og ég sagði.”

Þið getið þá sótt áfram þingflokksfundi með hinum tveimur þingmönnunum þú og Ólafur ef þau vilja ekki sitja þingflokksfundi með ykkur?

„Ég skal nú ekki segja. Ég er nú varaformaður þingflokksins og Ólafur er formaður þingflokksins. Þannig að ég veit nú ekki alveg hvernig þau ætla að koma þessu fram,” sagði Karl Gauti seinnipartinn í gær þegar hann var enn að vona að sættir gætu tekist í flokknum.

En þetta skýrist væntanlega frekar nú um helgina eða strax og þingfundir hefjast á mánudag.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.