Enn eitt tapið hjá Frosinone

Það gengur ekki né rekur hjá Emil Hallfreðssyni og félögum í Frosinone en þeir töpuðu enn einum leiknum í kvöld er liðið tapaði 3-2 fyrir Torino.

Tomas Rincón kom Torino í 1-0 á tuttugustu mínútu og Daniele Baselli tvöfaldaði forystuna fyrir Torino á 46. mínútu.

Frosinone var þó ekki af baki dottið. Edoardo Goldaniga minnkaði muninn á 58. mínútu og sex mínútum síðar jafnaði Camillo Ciano metin.

Tuttugu mínútum fyrir leikslok var það Alex Berenguer sem tryggði Torino sigurinn og lukkan ekki með Frosinone. Torino með sigrinum í áttunda sæti deildarinnar.

Emil og félagar eru einungis með eitt stig eftir fyrstu átta leikina. Þeir gerðu jafntefli við Bologna 26. ágúst en síðan hafa fylgt sex tapleikir í deildinni í röð.