Rán býður sig fram til formanns Neytendasamtakanna

Sex hafa nú tilkynnt um framboð til formanns Neytendasamtakanna. Rán Reynisdóttir, hársnyrtimeistari, sendi frá sér tilkynningu í dag þar sem hún lýsti yfir framboði sínu. Segist hún með því verða við áskorun hóps fólks sem vill vinna að eflingu samtakanna og hagsmunagæslu almennings.

Í tilkynningunni kemur fram að Rán sé ritari Félags hársnyrtisveina og hafi nýverið lokið námi til kennsluréttinda í iðnnámi. Hún sé einstæð móðir fjögurra barna á aldrinum tveggja mánaða til átta ára og hafi reynslu af því að reka „þungt heimili“.

Rán segir markmið hópsins að vinna á næstu vikum áætlun til eflingar Neytendasamtakanna. Það liggi fyrir að vilji sé innan verkalýðshreyfingarinnar að efla hagsmunagæslu almennings og því sé mikilvægt að tengja Neytendasamtökin við þá vakningu. Þá sé einnig mikilvægt að efla félagslegt starf Neytendasamtakanna og efna til öflugrar umræðu svo hægt sé að endurnýja stefnu og markmið samtakanna.

Fimm aðrir hafa lýst framboði til embættisins, þau Breki Karlsson forstöðumaður Stofnunar um fjármálalæsi, Guðjón Sigurbjartsson viðskiptafræðingur, Guðmundur Hörður Guðmundsson, fyrrverandi formaður Landverndar, Jakob S. Jónsson leiðsögumaður og leikstjóri, og Ásthildur Lóa Þórsdóttir, kennari og formaður Hagsmunasamtaka heimilanna.