Stjörnuspá Siggu Kling – Krabbinn: Töfrar yfir þér eins og regnboganum

Elsku Krabbinn minn, mikið er ég ánægð að þurfa að skrifa um þig, það er aldrei lognmolla eða leiðindi þegar þú mætir og þú getir einkennst af feimni þá finnst engum þú vera það. Þú ert allur tilfinningaskalinn en nærð ekki alveg að sjá sjálfan þig í réttu ljósi eins og aðrir sjá þig.

Þú býrð yfir svo mikilli vinnusemi og skapar þar af leiðandi ógleymanlegan karakter, það eina sem getur drepið þig er jafnvægisleysi, þá líður þér eins og skopparbolta sem hefur enga stjórn. Þetta gerist alltaf öðru hvoru en .þá er það heimili þitt sem gefur þér jafnvægi og ekkert annað. Það er í eðli þínu að gera þitt besta en ef þú verður reiður og ræðst á aðra áttu það til að nota slóttug brögð til að fá þínu framgengt og þar með áttu erfitt með að fyrirgefa sjálfum þér, svo hugsaðu áður en þú talar og láttu ekki skoðanir þínar í ljós á öðrum nema þær séu uppbyggilegar.

Í ástinni geturðu aðeins þrifist með maka sem hefur sjálfstraust og sterka sjálfsmynd til að taka fyrsta skrefið og umvefja þig. Eins og þú ert einlægur, skemmtilegur og frábær áttu það til að vera svo hryllilega stjórnsamur og tuðandi, þarna áttu líka að stoppa bæði í orðum og gjörðum, þá verður allt fullkomið. Núna ertu nýbúinn að eiga afmæli og það eru töfrar yfir þér eins og í regnboganum, það sem þú þráir mun dragast að þér eins og segull og gerast mjög hratt svo vertu viss um að það sem þú þráir er það sem þú virkilega vilt.

Það er magnandi spenna í loftinu og mikið af svörum sem þú hefur beðið eftir verða send til þín, núna hefurðu orkuna til að semja um allt svo byrjaðu að undirbúa og skrifa niður hvern þú vilt tala við og hvaða samninga þú vilt gera því réttu svörin koma sjálfkrafa til þín.

Frægir Krabbar: Bryndís Schram, Sigga Lorange Ostabúðarskvísa, Auddi Blö, sem við elskum öll, Dagur B. Eggertsson, borgarstjóri og dúlla, Ólafur Stefánsson, handboltakappi og heimspekingur, Edda Sif, Sindri Sindrason, Ásdís Halla Bragadóttir, Hjörvar Hafliðason og Lars Lagerbäck landsliðsþjálfari, Davíð hinn góði skóari í Hafnafirði, Stefán Árni Pálsson fréttamaður, Guðni Th. forseti Íslands, Friðbjörn Europartakóngur, Yesmine Olsen, höfundur og framleiðandi, George Michael, Kristófer Helgason, dagskrágerðamaður, Nuno Alexandre Bentin Servo veitingahúsakóngur, Helga Hafsteinsdóttir, hárgreiðsluséní á Akureyri, Íris Björk Tanya frumkvöðull og hönnuður, Liga Liepina hestaljósmyndari.