Miðstöð innanlandsflugs á BSÍ í framtíðinni

Samgönguráðherra mun á næstu dögum kynna áform um nýja flugstöð fyrir innanlandsflug í Vatnsmýri þrátt fyrir að áætlanir borgarinnar um að flugvöllurinn fari árið 2022. Nefnd sem fjallað hefur um málið segir fjárfestinguna ekki glatast víki völlurinn fyrir byggð.

Umferðarmiðstöðin hefur þjónað hlutverki sínu vel í áratugi en nú eru uppi hugmyndir um að byggja við húsið og breyta hlutverki þess og að þetta verði miðstöð innanlandsflugs á Íslandi á meðan flugvöllurinn er enn í Vatnsmýri.

Hugmyndin er ein af þremur í áfangaskýrslu sem hópur á vegum Samgönguráðuneytisins hefur unnið að og kynnt verður á næstu dögum.

„Sá sem að varð ofan á er að byggja upp Umferðarmiðstöðina BSÍ  og hafa hana sem flugstöð einnig. Það eru spennandi áform þar uppi sem að við munum væntanlega fara með inn í samkeppni um uppbyggingu og hún mun þá bæði nýtast gríðarlega vel ef innanlandsflugið verði áfram á Reykjavíkurflugvelli um langa framtíð,“ sagði Sigurður Ingi Jóhannsson, samgönguráðherra.

Hinar hugmyndirnar eru uppbygging flugstöðvar norðaustan við núverandi flugstöð á Reykjavíkurflugvelli eða norðan við skrifstofubyggingu Icelandair. En hugmyndin sem um ræðir er dýrust af þeim þremur.

Í skýrslu nefndarinnar kemur fram að uppbyggingu á BSÍ reitnum sé áhugaverðust og að þar náist samlegð og hagræði af því að tengja innanlandsflugið öllum almenningssamgöngum innan borgarinnar og samgöngum við alþjóðaflugvöllinn í Keflavík.

Til þess að þessi uppbygging gæti átt sér stað þyrfti að reisa undirgöng undir Hringbraut, sem flugfarþegar færu í gegn en að auki þyrfti að byggja upp nýtt flughlað á milli Norður/Suðurbrautarinnar og neyðarbrautarinnar svokölluðu.

Fulltrúar Reykjavíkurborgar hafa lýst yfir áhuga á að koma að hugmyndasamkeppni um BSÍ reitinn þrátt fyrir að ráð sé gert fyrir, í aðalskipulagi borgarinnar, að Reykjavíkurflugvöllur fari árið 2022.

„Það verður auðvitað að taka það upp núna á nýju kjörtímabili,“ sagði Sigurður Ingi.

Nefndin getur þess að fjárfestingin myndi gagnast áfram þó flugvöllurinn færi úr Vatnsmýri en Reykjavíkurborg hyggst byggja upp samgöngumiðstöð á svæðinu.

Í skýrslunni segir einnig að gangi áætlanir eftir muni farþegafjöldi með flugi, almenningssamgöngum og ferðaþjónustu sem færi um samgöngumiðstöð á BSÍ reitnum verða a.m.k. 10 milljónir manns eða 27.000 manns á dag sem að einhverju leyti er viðbótar við umferð sem á leið um Landspítalann og háskólanna á svæðinu, Vesturbæ og Miðbæ Reykjavíkur á hverjum einasta degi.