Kosningaloforð Sjálfstæðisflokksins: Forgangsraða í þágu eldri borgara og barna

„Þau eru stór en þau eru raunsæ og þau borga sig sjálf,“ segir Eyþór Arnalds, borgarstjóraefni Sjálfstæðisflokksins í Reykjavík. Hann kynnti kosningaloforð flokksins fyrir komandi sveitarstjórnarkosningar í Iðnó við Vonarstræti klukkan 11 í morgun.

Kosningaloforðin voru alls sjö talsins og af þeim má ráða að Sjálfstæðisflokkurinn leggi áherslur í samgöngumál, eldri borgara, daggæslu-og leikskólamál, uppbyggingu í borginni.

Í samtali við Berghildi Erlu, fréttamann Stöðvar 2, sagði Eyþór að til stæði að spara í stjórnkerfinu og skila fjármagninu í þjónustu eins og leikskólana. Eitt kosningaloforðið lýtur að því að borgarar eldri en 70 ára borgi ekki fasteignaskatt. Spurður að hvað það muni koma til með að kosta segir Eyþór að um sé að ræða hundruð milljóna.

„Auðvitað er það breytilegt eftir ári hvernig tekjurnar eru en þetta er tæki til þess að hjálpa eldri borgurum að lifa heima hjá sér, þeir sem geta og vilja, líka það að það hafa verið miklar skerðingar og álögur á eldri borgara, fasteignagjöld hafa hækkað um allt að 50% á kjörtímabilinu og við erum einfaldlega að koma til móts við íbúana, leiðrétta þeirra kjör og gera þeim betur kleift að búa í Reykjavík.“

Sjálfstæðisflokkurinn ætlar að fjármagna kosningaloforðin með því að hagræða í stjórnkerfinu. Til standi að fækka stjórnendum hjá Reykjavíkurborg.

Lofar að 2000 íbúðir rísi á ári

Sjálfstæðisflokkurinn lofar að 2000 íbúðir verði byggðar að jafnaði á ári. Í kynningunni talaði Eyþór um uppsafnaðan vanda sem yrði að leysa til að koma jafnvægi á húsnæðismarkað. Með það markmið fyrir augum vill Sjálfstæðisflokkurinn tryggja nægt lóðaframboð fyrir fjölbýli og sérbýli, ná fram hagkvæmari lausnum fyrir fyrstu kaup, leyfa byggð í Örfirisey og við Keldur. Þá segir Eyþór að mikilvægt sé að klára uppbyggingu í Úlfarsárdal.

Lofar að stytta ferðatímann til og frá vinnu um 20%

Flokkurinn boðar stórátak í samgöngumálum. „Við erum ekki Los Angeles, við erum Reykjavík,“ segir Eyþór sem segir að það sé ekki eðlilegt að hversu þung umferðins er á stundum. Hann segir að tafatíminn sé liður í lengingu vinnuvikunnar á tímum þar sem allt kapp sé lagt á að stytta hana.

Eyþór vill bæta Strætó með því að fjölga ferðum, bæta leiðakerfið og að koma upp betri skýlum. Hann segir að það sé mikilvægt hagsmunamál fyrir alla borgarbúa að létta á umferðinni.

Lofar að öll börn fái leikskólapláss við 18 mánaða aldur

Sjálfstæðisflokkurinn hyggst forgangsraða í þágu yngstu barnanna og leysa þann „fjölskylduvanda“, eins og Eyþór orðar það, sem hefur verið til staðar í Reykjavík. „Árið er 2018, ekki 1979,“ segir Eyþór þegar hann fjallar um manneklu og biðlista fyrir börn. Flokkurinn vill fjölga dagforeldrum með því að bjóða aðstöðu og hækka niðurgreiðslu frá borginni. Þá vill hann hækka lægstu laun leikskólakennara. Eyþór segir að þetta sé algjört forgangsmál.



Lofar að svifryksmengun fari ekki yfir heilsuverndarmörk

Að gamlárskvöldi undanskildu vill Sjálfstæðisflokkurinn lofa því að svifryksmengun fari ekki yfir heilsuverndarmörk. Eyþór segir að komið verði í veg fyrir það með því að styðja við rafbílavæðingu og tíðari þrifum í borginni. Þá vill hann auðvelda flokkun og endurvinnslu. „Reykjavík getur verið grænasta borg í Evrópu“.

Lofar að fella niður fasteignaskatta á eldri borgara 70 ára og eldri

„Þið eruð búin að borga nóg,“ segir Eyþór um eldri borgara og uppskar mikið lófaklapp úr sal. Sjálfstæðisflokkurinn vill styðja við eldri borgara með því að bæði fella niður fasteignaskatt á eldri borgara sem eru 70 ára og eldri og styðja við þá sem geta og vilja búa heima hjá sér með því að efla heimaþjónustu.

Lofar að stytta afgreiðslutíma í kerfinu um helming

Eyþór segir að kerfið sé allt of óskilvirkt og gamladags. Sjálfstæðisflokkurinn vill stytta boðleiðir, einfalda stjórnkerfið, nota nútímatækni og innleiða sjálfsafgreiðslu.

„Með því að fara í þessi sex atriði þá munum við koma Reykjavík aftur í það að vera í forystu,“ segir Eyþór þegar hann hafði lokið kynningu á kosningaloforðum Sjálfstæðisflokksins. 

Hér að neðan er hægt að horfa á kynninguna í heild sinni: