Stjörnuspá Siggu Kling – Vogin: Miklar tilfinningar í kringum þig

Elsku Vogin mín, það er nýbúið að vera fullt tungl í Vogarmerkinu sem gefur kraft til þín; það er fegurð, gleði og hamingja tengd þessu tungli og mikil spenna í loftinu. Þessu fylgir að skoðanir þínar verða mjög sterkar og þú færð kraft eins og jarðýta. Þú ýtir vandamálunum á undan þér og nærð að vera svo mikið í núinu sem er það eina sem maður hefur.

Fólk leitar í orkuna þína og kallar eftir að þú sýnir þeim öryggi því þú hefur þannig útgeislun og orku til að bera sem fær aðra til að treysta þér. Þú virkar samt stundum svo virðulegur á yfirborðinu en þegar maður kynnist þér þá ertu alveg til í tuskið og að hafa bara gaman.

Passaðu þig sérlega á því að fólk á það til að misskilja þig, svo vertu skýr í samskiptum því það mun gera allt svo miklu betra. Þú hefur svo mikið ímyndunarafl að þér getur fundist að þessi eða hinn sé pirraður út í þig eða vilji ekkert með þig hafa en þú munt taka eftir þú að þú ert ofsalega vinsæl og þó að sumt fólk skilji þig ekki, er það ekki bara spennandi?

Það eru miklar tilfinningar í kringum þig þessa mánuði, svo leyfðu þér að bindast böndum við annað fólk og sleppa fram af þér beislinu. Ekki hafa agann sem lykilatriði að lífinu þínu því það keyrir þig niður og gerir of stífa, en sveigjanleiki, til dæmis í því að gefa öðrum tækifæri sem þú hefur kannski ekki trú á eins og í ástinni mun hjálpa þér skilja hlutina betur. Þú býrð yfir svo mikilli visku svo að vinnan þín þarf að gefa þér mikla fjölbreytni því annars sofnar gleðin þín.

Að taka áhættu og treysta því að hlutirnir gangi vel mun tengja þig við betri tíðni eða orku sem lætur þér líða vel og er það í raun og veru það eina sem skiptir máli?

Skilaboðin þín eru: Núna er rétti tíminn

Frægir í Voginni: Kári Árnason landsliðsmaður, Glúmur Baldvinsson stjórnmálafræðingur, Hjalti flugþjónn, Ingi í Sign, Jón Axel Ólafsson athafnamaður, Matt Damon leikari, Íris Berg, fatahönnuðurinn minn, Mary Poppins, Svanhildur Hólm Valsdóttir, aðstoðarmaður ráðherra og sjónvarpskona, Hanna Birna Kristjánsdóttir, Lilja Dögg Alfreðsdóttir alþingiskona, Ósk Gunnarsdóttir útvarpskona, María Einarsdóttir ritari stjörnuspánnar, Arnþrúður Karlsdóttir útvarp Saga, Skúli Mogensen, Hulda Hólmkelsdóttir fréttakona, Walter Matthau, Olavia Newton John, Ragga Gísla, Steinn Steinarr, Margret Thatcher, Ragnheiður Elín Árnadóttir, hinn mikli meistari.