Fannst látinn í kjölfar #metoo ásakana

Suðurkóreski leikarinn Jo Min-ki, sem fjöldi kvenna hafa ásakað um kynferðislegt ofbeldi, fannst látinn á heimili sínu í dag. BBC greinir frá.

Jo Min-ki var ásakaður um að brjóta á minnst átta konum. Leikarinn, sem var 52 ára, varð nafntogaður í #metoo hreyfingunni í heimalandinu. Hann var sakaður um að brjóta kynferðislega á nemendum sínum við Cheongju Háskólann þar sem hann hefur kennt síðastliðin ár. 

Min-ki neitaði upphaflega að hafa gert konunum mein en gaf út yfirlýsingu 27. febrúar þar sem hann bað brotaþola afsökunar. „Þetta er allt mér að kenna og engum öðrum,“ sagði hann. „Ég bið öll mín fórnarlömb innilega afsökunar á þeim sársauka sem þær hafa þurft að ganga í gegnum og héðan í frá mun ég ekki forðast félagslegar og lagalegar afleiðingar mistaka minna.“

Leikarinn hefur verið klipptur út úr þáttunum „Children of the small god“ en leikarinn Lee Jae Yong kemur í hans stað.