Hjalti fær loksins greitt frá Íshestum

Hjalti Gunnarsson, ferðaþjónustubóndi á Kjóastöðum í Bláskógabyggð í Biskupstungum, vann mál sitt við Íshesta fyrir Héraðsdómi Reykjaness. Dómur var kveðinn upp á fimmtudag. Íshestar þurfa að greiða Hjalta ógreidda fimmtán milljóna króna skuld frá árinu 2016.

Forsaga málsins er sú að Hjalti fór í 24 ár með ferðamenn í lengri hestaferðir yfir Kjöl eða í styttri hestaferðir. Ferðirnar voru í samvinnu við Íshesta sem seldu ferðirnar, tóku við greiðslu og fluttu fólkið til Hjalta þangað sem það var sótt að ferð lokinni. Viku fyrir ferð fékk Hjalti nafnalista frá Íshestum og í lok ferðar sendi hann Íshestum reikning.

Bar á greiðsludrætti með nýjum eigendum

Hjalti segir samstarfið hafa gengið hnökralaust fyrir sig þangað til Einar Bollason seldi Íshesta árið 2012 og Fannar Ólafsson tók við fyrirtækinu og gegndi stöðu framkvæmdastjóra. Þá hafi farið að bera á greiðsludrætti. Þann 1. desember 2015 hafi verið gerður samstarfssamningur um hestaferðir sumarið 2016 og hvaða gjald skyldi greiða fyrir hvern farþega.

Reikningar voru gefnir voru út í júlí, ágúst og september 2016 og stílaðir á Íshesta sem þá var komið með nýja kennitölu. Fyrstu tveir reikningarnir voru greiddir 19. september það ár en fjórir til viðbótar, sem námu samanlagt tæplega 15 milljónum króna, fengust ekki greiddir. Íshestar svöruðu ekki tveimur innheimtubréfum í október og nóvember þetta ár.

Íshestar báru fyrir sig fyrir dómi að þeim væri ekki skylt að greiða reikningana þar sem að samningur Hjalta var við Íshesta á eldri kennitölu. Íshestum, á nýrri kennitölu, væri því ranglega stefnt.

Allur reksturinn seldur til nýja félagsins

Samkvæmt samningi Íshesta ehf um kaup á eldra félaginu var allur rekstur hins gamla félags seldur til hins nýja félags. Þar með talið seú allar ferðir, öll seld þjónustu og þær ferðir sem hafi verið pantaðar fyrir afhendingu á félaginu en verði inntar af hendi eftir afhendingardag. Allar tekjur og kostnaður vegna framseldra verka, sem falli til eftir afhendingardag, tilheyri kaupanda, þ.e. Íshestum á nýrri kennitölu.

„Þetta ákvæði kaupsamningsins verður ekki skilið á annan hátt en þann að stefndi hafi yfirtekið kostnað vegna umdeildra hestaferða, hvort sem þær voru pantaðar eða farnar fyrir eða eftir afhendingardag 20. júní 2017. Líta verður svo á að með þessum ákvæðum kaupsamningsins hafi stefndi orðið skuldbundinn gagnvart stefnanda,“ segir í niðurstöðu dómsins.

Tölvupóstssamskipti styðja mál Hjalta

Þá styðji önnur gögn málsins þessa niðurstöðu enda hafi nýr framkvæmdastjóri Íshesta, Skarphéðinn Berg Steinarsson, greitt tvo reikninga frá Hjalta í september 2016 og sömuleiðis sent nafnalista til Hjalta í júní 2016 vegna ferða sem farnar voru 2. og 9. júlí. Þá bendi tölvupóstssamskipti Hjalta og Skarphéðins til þess að Skarphéðinn hafi litið svo á að Íshestar væri skuldbundið Hjalta vegna hestaferðanna sumarið og haustið 2016.

Í samninngum frá 1. desember 2015 fyrir sumarið 2016 kom fram að Íshestar skyldu greiða Hjalta 166.500 krónur fyrir hvern farþega í sex daga Kjalarferðir, 83.250 krónur fyrir þriggja daga sveitarævintýri og 52.200 krónur fyrir Norðurljósaferðir.

„Reikningar stefnanda eru samkvæmt þessari verðskrá og jafnframt tilgreindur fjöldi farþega. Krafa stefnanda er því skýr og ekki þörf fyrir undirgögn til stuðnings kröfunni. Krafa stefnda um lækkum á kröfu stefnanda verður því ekki tekin til greina.“

Síðasta sumar til bjargar

Hjalti sagði í samtali við Stundina í síðustu viku að hann og kona hans, Ása Viktoría Dalkarls, skrimptu. Það hafi bjargað þeim að síðasta sumar hafi verið óvenju gott.

„Það má kannski segja að Íshestar hafi komið undir mig fótunum, en kippt þeim svo undan mér aftur. Maður fór að sjá peninga fljótlega eftir að maður fór að vinna hjá þeim, allavega svona eitthvað aðeins rúmlega en það sem maður þurfti nauðsynlega á að halda. Svo núna er maður kominn í verri stöðu en maður var þegar maður byrjaði.“

Fannar Ólafsson segir, í samtali við Stundina, að reksturinn hafi verið mjög erfiður. „Við vorum að selja ferðir níu mánuðum áður en þær voru farnar,“ segir hann.

„Þær voru allar seldar í evrum, eða erlendum gjaldmiðli, en þegar kom að því að fá þær greiddar, níu mánuðum seinna, var krónan búin að styrkjast um eitthvað um þrjátíu prósent. Fyrir lítið fyrirtæki eins og Íshesta, að tapa tuttugu til sextíu milljónum bara á gengismun á þessum tíma, það segir sig sjálft hvernig það fór.“

Fannar segist hafa tapað 96 milljónum króna með kaupunum á Íshestum. 34 milljónir hafi farið úr eigin vasa til að standa við greiðslur til bænda.

Ekki liggur fyrir hvort Íshestar munu áfrýja dómi héraðsdóms til Landsréttar.