Eltihrellir dvaldi í 12 tíma á heimili Rihönnu

Maður, sem talinn er vera eltihrellir, braust inn á heimili söngkonunnar Rihönnu í Los Angeles í liðinni viku. Bandarískir saksóknarar halda því fram að maðurinn hafi dvalið í um hálfan sólarhring á hemili hennar.

Rihanna var ekki heima þegar maðurinn braust inn til hennar þann 9. maí síðastliðinn. Málið er enn til rannsóknar en talið er að eltihrellirinn hafi hoppað yfir grindverk til að komast að heimili hennar. Hvernig hann komst svo inn í sjálft húsið liggur ekki fyrir.

Engu að síður er talið nokkuð ljóst að hann hafi dvalið í um 12 klukkustundir á heimili hennar áður en aðstoðarmaður söngkonunnar kom að honum.

Maðurinn, hinn 27 ára gamli Eduardo Leon, var handtekinn daginn eftir og hefur verið ákærður fyrir húsbrot, eignaspjöll og að verða ekki við tilskipunum lögreglu. Verði hann fundinn sekur gæti hann átt yfir höfði sér sex ára fangelsi.