Stjörnuspá Siggu Kling – Tvíburarnir: Vandamálin sjálf sem drepa þig

Elsku Tvíburinn minn, þú hefur að sjálfsögðu tvær hliðar, þá sterku sem getur allt og þá veiku sem getur orðið þunglynd. Þú þarft að halda með þeirri sterku og skapa daginn sem þú ert að lifa í með þeirri svakalegu sterku og skapa sumarið í hverjum degi sem þú lifir.

Húmorinn er þinn besti kostur því það er vopn sem þú hefur til að láta erfiðleikana hverfa. Að sjálfsögðu munu allar kringumstæður mæta þér og allskonar erfiðleikar mæta þér en það eru ekki vandamálin sjálf sem drepa þig heldur afstaða þín til þeirra. Þú munt nota þína miklu visku  til að hjálpa þér útúr þeim vandamálum sem mæta þér núna, þú munt vernda aðra og það mun láta þér líða svo miklu betur.

Þú mátt svo sannarlega nýta þér allar tilfinningarnar sem kom til þín því að skapleysi fer þér engan veginn, ef þú ert reiður sýndu reiðina, þá losnarðu við hana, leyfðu þér að vera vondur út í alheiminn þú munt alltaf finna leið útúr erfiðleikunum. Þú finnur á þér og ert búinn að hugsa hvað þú átt að gera næst eins og þú sért búinn að sjá fyrir þér kvikmyndina sem heitir Lífið.

Um leið og maí er kominn þá sérðu að allt hafði tilgang þó þú hafir ekki stjórnað því sem kom til þín. Þú hefur svo sterkan huga og útgeislun, en þú þarft að samræma þetta. Apríl mun sýna þér hvers þú ert megnugur, þú verður sterkur í þeim aðstæðum sem eru í kringum þig og maí sýnir þér friðsemi og ró í hjartanu og síðan er bara sumarið og það er svo sannarlega eins og ég hef alltaf sagt þinn eini sanni tími.

Mörg ykkar munu flytja erlendis og finnast það bara hreint ágætt því þín orka er tengd sólinni og skilaboðin til þín eru: Þar sem sólin er, þar ert þú.

Frægir Tvíburar: Ragnar Sigurðsson landsliðsmaður, Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson, bæjarstjóri Garðabæjar, Andri Freyr útvarpsmaður og Lýðveldið Ísland, Donald Trump, Þórarinn Þórarinsson blaðamaður, Bjartmar Guðlaugsson, söngvari og snillingur, Jóhanna Heiðdal lögfræðingur.