Grilla þúsund hamborgara í Þorlákshöfn

Hátt í átta þúsund manns eru nú stödd á Unglingalandsmóti UMFÍ í Þorlákshöfn. Á mótinu koma saman ungmenni á aldrinum 11-18 ára og etja kappi í hinum ýmsu greinum.

Í tilkynningu frá mótshöldurum segir að vinsælustu greinar mótsins séu frjálsar íþróttir, knattspyrna og körfubolti, en nýrri greinar hafa einnig vakið lukku meðal keppenda mótsins og má þar nefna sandkastalagerð, bogfimi, strandhandbolta og dorgveiði.

Keppendur láta sér þó ekki nægja að stunda íþróttir af miklum dugnaði, þar sem sjálfboðaliðar knattspyrnufélagsins Ægis og Ungmennafélagsins Þórs hafa grillað hátt í 1.000 hamborgara og útbúið 50 kíló af humarpylsum, eða humslum, handa gestum mótsins.

Ragnheiður Hannesdóttir sem sér um innkaup á hamborgurum, humar og öllu tilheyrandi fyrir mótið, segir að salan hafi gengið mjög vel, og að magnið sem eldað var hafi jafnvel farið örlítið fram úr áætlun.

Langar raðir mynduðust eftir góðgætinu og þegar mest lét stóð fólk í 15-20 metra löngum röðum og sleikti sólina meðan það beið þess að næla sér í gómsætan hamborgara.

Humarpylsurnar, eða humslur, eru humar í pylsubrauði með hvítlaukssósu, og þykja mikið lostæti í Þorlákshöfn. Ragnheiður segir humslurnar afar vinsælar á helstu viðburðum bæjarins og að bæjarbúar stökkvi alltaf til þegar humslur eru í boði.

Í setningarávarpi sínu í gær, sagði Haukur Valtýsson, formaður UMFÍ, að Unglingalandsmótið hefði fest sig í sessi sem hátíð þar sem öll fjölskyldan gæti varið góðum tíma saman í hreyfingu og íþróttum. Einnig benti hann á að mótið hefði forvarnargildi sem myndi skila sér í betri framtíð.

 „Við skulum horfa til þess að við erum að varðveita og verja meiri mannauð með því að vinna að meiri og víðtækari forvörnum, fyrir okkar ungu kynslóðir en mikill mannauður er að tapast við það þegar ungt fólk ánetjast fíkniefnum. Það eru einnig margir aðrir þættir forvarna sem skila sér hér til alls þess unga fólks sem er að taka þátt í mótinu. Við getum nefnt til dæmis að börn og unglingar kynnast og prófa íþróttir sem þau hafa ekki þekkt áður og eru kannski að finna sína íþrótt hér,“ sagði Haukur.