Mikið tjón á höfuðborgarsvæðinu eftir aftakaveður

Mikið tjón varð víða á höfuðborgarsvæðinu í aftakaveðri í gær og nótt og hefur slökkviliðið aldrei farið í fleiri útköll á einum sólarhring. Víða fylltust bíla-og íbúðakjallarar af vatni, vatn streymdi upp úr salernum, tjörn flæddi yfir bakka sína og hótelskilti losnaði á Laugaveginum.

Gríðarleg úrkoma fylgdi óveðrinu en hún mældist þrjátíu og þrír millílítrar á einum sólarhring sem er tæpur helmingur af meðaltalsúrkomu allan febrúar. Slökkviliðið á höfuðborgarsvæðinu hafði í nógu að snúast frá því um kvöldmatarleytið í gær þegar skiltið á Hlemmi Square, hóteli á Laugavegi, losnaði og þurfti að loka svæðinu í kring. Að lokum tókst þó að binda skiltið niður.

Kalla þurfti út aukamannskap í nótt og naut slökkviliðið aðstoðar björgunarsveitarmanna þegar erillinn var sem mestur.

Seltjörn í Seljahverfi í Breiðholti flæddi yfir bakka sína og út á vegi og gangstéttir auk þess sem nálægur skúr fylltist af vatni.

Slökkviliðið var enn að störfum í dag en fráföll höfðu stíflast í hjúkrunarheimilinu Skógarbæ og vatn flætt inn í kjallara hússins. Vatnið kom upp úr klósettum og flæddi um alla ganga.

Mikið starf beið slökkviliðs og hreingerningarfólks.

„Þegar við náum vatninu frá húsinu þá byrjum við að skafa hér gólfið inn í niðurföll og sjáum hvort þetta náist ekki mest en svo verður sérhæft fólk að koma og þrífa eftir þetta,“ segir Oddur Hallgrímsson, varðstjóri hjá slökkviliðinu á höfuðborgarsvæðinu.

Hvað kom vatn upp úr mörgum klósettum?

„Það eru ýmis niðurföll og klósett sem hafa farið hér um. Það hefur gerst einhvern tíman í nótt.“

Bílakjallari hússins var líka fullur af vatni.

„Hér er einhvers konar vandamál með frárennsli þannig að það fer ekkert frá húsinu og kallarar sem eru svona niðurgrafnir fyllast bara af vatni á þessu svæði núna,“ segir Oddur.

Guðmundur Jóhannsson, framkvæmdastjóri hússins, segir mikilvægt að fara yfir fráveitumálin á svæðinu og segir um talsvert tjón að ræða.

„Þetta verður talsvert tjón, við erum náttúrulega tryggð fyrir þessu en það liggja ekki fyrir neinar tölur um það hvað þetta er mikið.“

Verið er að byggja fjölbýlishús fyrir eldri borgara á næstu lóð og hafði grunnur þar fyllst af vatni og tæki, skúrar og kranar skemmst.