Framfarakóngur NBA-deildarinnar mætir Íslandi 31. ágúst

Tveir leikmenn Milwaukee Bucks fóru heim með verðlaun af verðlaunahátíð NBA-deildarinnar sem var haldin í gær.

Malcolm Brogdon var valinn nýliði ársins og Giannis Antetokounmpo framfarakóngur ársins.

Sá síðarnefndi er grískur landsliðsmaður og verður í eldlínunni þegar Ísland og Grikkland mætast á EM í körfubolta í Helsinki 31. ágúst næstkomandi.

Antetokounmpo blómstraði á síðasta tímabili eftir að Jason Kidd, þjálfari Milwaukee, færði hann í stöðu leikstjórnanda.

Hinn 2,11 metra hái Antetokounmpo hækkaði sig í öllum tölfræðiþáttum frá árinu á undan og bætti auk þess skotnýtinguna sína.

Gríska undrið var með 22,9 stig að meðaltali í leik, 8,8 fráköst, 5,4 stoðsendingar, 1,9 varin skot og 1,6 stolna bolta á síðasta tímabili.

Á þarsíðasta tímabili var Antetokounmpo með 16,9 stig, 7,7 fráköst, 4,3 stoðsendingar, 1,4 varin skot og 1,2 stolna bolta í leik. Hann bætti sig því umtalsvert á milli ára.

Russell Westbrook var valinn verðmætasti leikmaður tímabilsins (MVP) en hann náði þeim einstaka árangri að vera með þrefalda tvennu að meðaltali í leik.

Draymond Green, leikmaður meistara Golden State Warriors, var valinn besti varnarmaðurinn.

Mike D'Antoni, þjálfari Houston Rockets, var valinn þjálfari ársins og lærisveinn hans, Eric Gordon, besti sjötti leikmaðurinn.