Dætur Gumma Ben í nýju myndbandi Kristínar Ýrar

Nýtt myndband frá Kristínu Ýr er frumsýnt hér á Vísi en í því leika meðal annars dætur Gumma Ben og Erla, eiginkona landsliðsþjálfarans Freys Alexandersonar. Kannski annan dag er fyrsta lagið sem Kristín Ýr gefur út á solo ferli sínum en hún sýnir á sér nýja hlið því lagið er róleg en kraftmikil ballaða með miklum stíganda. Einhverjir muna eftir Kristínu Ýr úr rapphljómsveitinni Igore sem gaf út plötuna 9 Líf árið 2004.

Textinn fjallar um móðir hennar, sem féll frá eftir baráttu við krabbamein.

„Textinn er bara einlægur og frekar átakanlegur fyrir fólk sem þekkir til. Og jafnvel líka fyrir þá sem hafa misst einhvern nákominn. Hann fjallar um tilfinningar og upplifun mína í kringum fráfall móður minnar sem greindist með krabbamein í september 2010 og féll frá aðeins tveimur vikum síðar. Og þar sem ég er ömurleg að tjá tilfinningar mínar þegar mikið liggur við þá horfði ég dofin á þennan ömurlega sjúkdóm draga lífið úr mömmu minni og hugsaði hvenær væri rétta augnablikið til að segja henni að mér þætti vænt um hana, sem ég hafði aldrei gert, og alla hlutina sem eðlilegt fólk segir við þá sem því þykir vænt um. En áður en ég kom upp orði dró hún sinn hinsta andadrátt og ég sat hjá henni, þögul sem gröfin. Mín tjáningarleið hefur alltaf verið í textaformi og bundnu máli. Svo þetta lag fæddist í kring um þessa upplifun.“

Hingað til hefur fólk heyrt Kristínu Ýr rappa. Í laginu Kannski annan dag sýnir Kristín Ýr á sér nýja hlið sem söngkona. Hún hóf söngnám hjá CVS (Complete Vocal Studios) árið 2015 og seinna hjá Vocal Art. Í dag er hún í námi hjá CVS sem heitir söngsteypan.

Myndbandið er tekið upp af Inga Bauer hjá Kalt Studios. En það er meðal annars tekið upp í Straumi þar sem móðir Kristínar Ýrar fæddist og bjó um tíma. Í því koma fram nokkur brot úr fortíðinni og til að leika Kristínu Ýr sem barn fær hún til lið við sig Kötlu Guðmundsdóttur og Köru Guðmundsdóttur, tvær yngstu dætur Gumma Ben.

En Kristín Ýr er góður vinur fjölskyldunnar því hún spilaði fótbolta með móður stelpnanna, Kristbjörgu Ingadóttur og hefur þjálfað elstu dóttir þeirra Karen Guðmundsdóttur. Móður Kristínar Ýrar, Helgu Kristjánsdóttur leikur Erla Súsanna Þórisdóttir, vinkona Kristínar Ýrar. Hún er að sjálfsögðu líka fyrrum fótboltastelpa úr Leikni og Val og er gift Frey Alexandersyni A-landsliðþjálfara kvenna. Kristín Ýr er alls ekki hætt að rappa og er von á meira efni á næstunni í formi R&B með söng og rappi.