Kæru farþegar, verið velkomin til Íslands

Það er alltaf jafn yndisleg tilfinning að lenda á Keflavíkurflugvelli og fá hlýjar og góðar móttökur. Ég hef oft reynt að setja mig í spor ferðamanna sem koma til landsins, hvernig er upplifunin af því að vera gestur á Íslandi? Hvernig tökum við á móti ferðamönnum? Hvernig er viðhorf okkar gagnvart þeim og hversu opin og vingjarnleg erum við?

Ég hef ferðast um vinsæla ferðamannastaði bæði hérlendis og erlendis og sú umræða að við séum komin að þolmörkum finnst mér ansi ýkt í þeim samanburði. Auk þess hefur aðstaða fyrir ferðamenn á Íslandi verið bætt verulega á mörgum stöðum og margir nýir og spennandi afþreyingarmöguleikar í boði.

Hvað varðar umræðu um gjaldtöku þá finnst mér alls ekki óeðlilegt að greiða fyrir þjónustu sem er veitt hverju sinni, enda ræður framboð og eftirspurn alltaf þegar á hólminn er komið.

Um 50% af hagvexti frá 2010 eru tilkomin vegna ferðaþjónustunnar og undanfarin sex ár hefur ferðaþjónustan búið til rúmlega níu þúsund ný störf og hlutfall greinarinnar í útflutningstekjum landsins hefur farið úr 20% árið 2010 í 39% árið 2016.

Einn stærsti ferðaþjónustuaðili í heimi, TripAdvisor, setti Ísland á kortið í sumar þegar hann fór í sameiginlega markaðsherferð með Reykjavík Excursions og kynnti Ísland sem einn mest spennandi áfangastað í heimi. Viðskiptavinir TripAdvisor gátu tekið þátt í happdrætti þar sem vinningurinn var Unleash Iceland ferð til Íslands fyrir tvo, flug, gisting í fjórar nætur og margvíslegar dagsferðir. Ferðalagi vinningshafanna var fylgt eftir og var einstaklega gaman að fylgjast með upplifun þeirra.

Upplifun hangir saman við væntingar. Því er mikilvægt að stýra væntingum og það er hlutverk allra Íslendinga að taka vel á móti ferðamönnum hvar sem þeir koma, hvort sem við erum í ferðaþjónustu eða ekki. Þá er gott að hafa í huga hvernig við viljum að tekið sé á móti okkur hvert sem við förum sem ferðamenn. Því er líka mikilvægt að við tölum á jákvæðan hátt um íslenska ferðaþjónustu.

Við þökkum fyrir ánægjuleg kynni á Íslandi og vonumst til að sjá ykkur aftur fljótlega.

Greinin birtist fyrst í Markaðnum, fylgiriti Fréttablaðsins um viðskipti og fjármál.