Tólf látnir eftir að Hato gekk yfir suðurhluta Kína

Minnst tólf eru látnir eftir að fellibylurinn Hato gekk yfir Makaó, Hong Kong og suðurhluta Kína í gær.

Flæddi meðal annars inn á stræti Hong Kong og þurftu þúsundir manna að flýja heimili sín.

Átta manns létu lífið í sjálfsstjórnarhéraðinu Makaó og fréttaljósmyndir þar sýna bíla á bólakafi og fólk á sundi þar sem vanalega má sjá götur og göngustíga.

Hato náði fyrst landi nærri borginni Zhuhai í Guangdong-héraði á hádegi í gær að staðartíma.

Yfirvöld í Kína hafa varað við flóðum og hættu á aurskriðum á þeim svæðum þar sem fellibylurinn fór yfir.

Hviður fóru mest upp í 49 metra á sekúndu.