Fengu símagögn frá símafyrirtæki Arturs í nótt

Enn hefur ekkert spurst til Arturs Jarmoszko, 26 ára karlmanns frá Póllandi, sem lögreglan á höfuðborgarsvæðinu lýsti eftir á fimmtudag.

Síðast sást til Arturs rétt fyrir miðnætti í Lækjargötu í miðbæ Reykjavíkur þann 28. febrúar síðastliðinn.

Guðmundur Páll Jónsson, lögreglufulltrúi, segir að lögreglan hafi fengið símagögn frá símafyrirtæki Arturs í nótt. Nú sé unnið að því að skoða gögnin til að komast að því hvar sími Arturs var síðast en tveimur tímum eftir að síðast sást til Arturs slokknaði á síma hans.

Lögreglan á fund með Landsbjörgu fyrir hádegi í dag og eru björgunarsveitarmenn í viðbragðsstöðu. Í kvöldfréttum stöðvar 2 í gær sagði fjöldskylda Arturs að hann hefði tekið út alla þá fjárhæð sem hann átti á reikningi sínum sama daga og hann hvarf. Guðmundur Páll segir það vera rétt en að fjárhæðin sé óveruleg.