Margir gætu misst af sérstöku úrræði vegna kaupa á fyrstu fasteign

Fjöldi Íslendinga gæti misst af sérstöku úrræði vegna kaupa á fyrstu fasteign ef ekki er sótt um fyrir næsta sunnudag. Um er að ræða heimild til að ráðstafa séreignarsparnaði inn á fasteignalán í allt að tíu ár. Sviðsstjóri hjá ríkisskattstjóra segir fjölmargar umsóknir hafa borist síðustu daga.

Með lögum sem tóku gildi 1. júlí síðastliðinn var einstaklingum heimiluð skattfrjáls úttekt séreignasparnaðar vegna kaupa á fyrstu íbúð. Heimildin er þó bundin ýmsum skilyrðum, en þannig þarf umsækjandi að eiga minnst 30 prósent eignarhlut í fasteigninni og ekki mega vera að henni fleiri en tveir eigendur. Þá er það skilyrði að sótt sé um úrræðið ekki síðar en 12 mánuðum frá undirritun kaupsamnings.

Lögin tóku við af eldra úrræði frá 2014 þar sem heimilt var að nýta séreignasparnað til ráðstöfunar inn á lán á þriggja ára tímabili. Með nýja úrræðinu er fyrstu kaupendum hins vegar gert kleift að nýta séreignasparnaðinn á samfelldu tíu ára tímabili. Samkvæmt lögunum er þeim sem keyptu sína fyrstu fasteign á tímabilinu frá 1. júlí 2014 til 30. júní 2017 einnig unnt að nýta sér úrræðið. Umsóknarfrestur til þess er hins vegar aðeins út árið 2017, eða eftir þrjá daga. 

„Það var ákveðið að hafa einhver skil á því hvenær fólk yrði að vera búið að sækja um og það var ákveðið að það yrði um áramótin fyrir þá sem voru búnir að kaupa áður en þessi lög tóku gildi,” sagði Jarþrúður Hanna Jóhannsdóttir, sviðsstjóri atvinnurekstrarsviðs ríkisskattsjóra, í kvöldfréttum Stöðvar 2.

Umsóknir hafa hrannast inn

Þetta þýðir að þeir sem ekki verða búnir að sækja um úrræðið fyrir næstkomandi sunnudag munu ekki koma til með að geta nýtt sér það. 

„Þá eru þeir í rauninni úti en þeir geta farið inn í eldra séreignarsparnaðarúrræðið en það gildir einungis til 30. júní 2019, þannig að þá eru þeir ekki inn í þessum 10 ára fasa,” sagði Jarþrúður.

Jarþrúður telur líklegt að stór hópur fólks hafi hreinlega ekki áttað sig á tilvist úrræðisins, en gríðarlegur fjöldi umsókna hafi borist skattstjóra síðustu daga. „Við sendum núna 20. desember tölvupóst á ákveðinn hóp, markhóp sem við töldum mjög líklegan. Það voru vægast sagt mjög góð viðbrögð og hafa komið um 1300 umsóknir frá þeim tíma.”

En hvernig er þá staða þeirra sem þegar hafa keypt sér fyrstu íbúð – en eru enn ekki farnir að greiða í séreignalífeyrissjóð?

„Það er náttúrulega mjög knappur tímarammi til þess en við hvetjum alla til að setja inn umsókn í gegnum skattur.is og ganga svo strax frá því að fara að greiða í sjóð því að þá myndu greiðslur gilda frá því í janúar,” sagði Jarþrúður að lokum.