Sveinki færir grænlenskum börnum jólapakka frá Íslandi

Íslenski jólasveinninn Stekkjastaur heldur til Kulusuk eftir helgi þar sem hann hyggst færa grænlenskum börnum jólagjafir. Gjafanna er aflað af félagsmönnum í skákfélaginu Hróknum, en þeir voru í óða önn að pakka inn í dag. Undanfarin fimmtán ár hafa félagar í Hróknum glatt grænlensk börn með gjöfum um jólin. Verkefnið er unnið í samstarfi við ýmis fyrirtæki sem leggja í púkk auk þess sem flogið er frítt með gjafirnar og sveinka.  

Gjöfunum var pakkað inn í vöruskemmu við Geirsgötu nú síðdegis, en þar var fólk önnum kafið við að tryggja að hægt væri að koma glaðningum út fyrir jólin. Margir hafa lagt söfnuninni lið, en í öllum pökkunum má meðal annars finna handprjónaðar flíkur sem hópur kvenna hefur unnið að því að prjóna í Gerðubergi í Breiðholti í hverri viku. Um 60 konur hafa tekið þátt í verkefninu, en Henný Níelssen, einn forsvarsmanna verkefnisins, segir hlýja vettlinga koma sér vel á Grænlandi. Þannig sé að jafnaði afar kalt, en mörg þeirra barna sem gjafirnar þiggja búi við talsverða fátækt. Þau gleðjist því mjög þegar komið er með pakkana.

Frétt Stöðvar 2 um málið og viðtal við Henný Níelssen má sjá í spilaranum að ofan.