Rússar bera miklar væntingar til íslenskra stuðningsmanna á HM

Ómar Smárason, fjölmiðlafulltrúi KSÍ, sagði frá því að fjölmiðlafundi í dag að Rússar hafi miklar væntingar til íslenskra stuðningsmanna á HM næsta sumar.

Miðasala á HM hefst 5. desember fyrir stuðningsmenn en fjórum dögum áður verður dregið í riðla í úrslitakeppninni.

„Það er ekki fyrstir koma fyrsti fá því glugginn verður opinn í langan tíma. Stuðningsmenn hafa því tíma til að skoða hvar við spilum upp á ferðlög og annað,“ sagði Ómar.

„Rússarnir hafa miklar væntingar til íslenskra stuðningsmanna og vilja meina að okkar fólk muni setja mikinn svip á keppnina,“ sagði Ómar.

„Þeir munu gera allt sem þeir geta til að greiða leið okkar stuðningsfólks,“ saðgi Ómar.

Stuðningsmenn Íslands slógu í gegn á Evrópumótinu í Frakklandi sumarið 2016 og Víkingaklappið er orðið hluti af knattspyrnusögunni.