Í gæsluvarðhaldi til 16. nóvember vegna innflutnings á amfetamínbasa

Fjórir menn sem grunaðir eru um innflutning á amfetamínbasa hafa verið úrskurðaðir í áframhaldandi fjögurra vikna gæsluvarðhald til 16. nóvember næstkomandi.

Mennirnir fjórir voru handteknir í Skipholti í ágúst grunaðir um fíkniefnamisferli. Húsleit var framkvæmd á tveimur stöðum og hafa mennirnir fjórir setið í gæsluvarðhaldi frá 25. ágúst.

Mennirnir eru sem fyrr segir grunaðir um innflutning á amfetamínbasa, en amfetamínbasi er notaður til þess að útbúa amfetamínsúlfat. Það amfetamín sem er í dreifingu er amfetamínsúlfat blandað íblöndunarefni. 

Rannsókn á lokametrunum

Hald var lagt á um 1300 mililítra af amfetamínbasa í aðgerðum lögreglu. Samkvæmt þeim upplýsingum sem lögreglan hefur væri hægt að búa til 9,9 kíló af amfetamíni úr því magni af amfetamínbasa.

Mennirnir eru allir pólskir og á þrítugs og fertugsaldri. Einn þeirra er búsettur hér á landi en hinir þrír eru búsettir erlendis.

Grímur Grímsson, yfirmaður miðlægrar rannsóknardeildar hjá lögreglu, segir að rannsókn málsins sé á lokametrunum og að það verði sent héraðssaksóknara á allra næstu dögum.