Stórir skjálftar skóku Bárðarbungu í nótt

Tveir jarðskjálftar í kringum fjóra að stærð mældust í Bárðarbungu um klukkan tvö í nótt. Annar minni skjálfti mældist á milli hinna tveggja.

Fyrsti skjálftinn var 3,8 að stærð og átti upptök sín 5,6 kílómetra austsuðaustur af Bárðarbungu samvæmt vef Veðurstofu Íslands. Hann reið yfir kl. 1:42.

Annar skjálfti fylgdi strax í kjölfarið upp á 2,7 og þremur mínútum síðar gekk sá stærsti yfir, að stærðinni 4,2.

Allir skjálftanir áttu upptök sín á bilinu 5,3-8,2 kílómetra austsuðaustur af Bárðarbungu á um það bil kílómetra dýpi.