Innlent

Fyrsta samflug þrista yfir Íslandi í sextíu ár

Kristján Már Unnarsson skrifar
Þristarnir út af Snæfellsnesi í kvöld. Myndin er tekin úr Breitling-þristinum, sem er rétt fyrir aftan og til hliðar við Pál Sveinsson.
Þristarnir út af Snæfellsnesi í kvöld. Myndin er tekin úr Breitling-þristinum, sem er rétt fyrir aftan og til hliðar við Pál Sveinsson. Stöð 2/Kristján Már Unnarsson.

Tveir fljúgandi forngripir af gerðinni Douglas DC-3 fóru í samflug í kvöld yfir Reykjavík og vestur á Snæfellsnes. Formaður Þristavinafélagsins segir að elstu menn muni síðast eftir samflugi tveggja þrista hérlendis fyrir meira en sextíu árum. Fjallað var um viðburðinn í fréttum Stöðvar 2 í beinni útsendingu sem sjá má hér en vélarnar flugu mjög þétt saman.

Þristarnir eru báðir á áttræðisaldri, annarsvegar íslenski þristurinn Páll Sveinsson, sem var smíðaður árið 1943, og svo þristurinn, sem svissneski úraframleiðandinn Breitling lét gera upp, en sú vél er frá árinu 1940. Hún er í hnattflugi og er henni ætlað að komast í sögubækur sem elsta vél sem flogið hefur umhverfis jörðina.

Það verður sífellt fátíðara að svo gömlum flugvélum sé flogið til Íslands yfir úthafið og því gripu íslenskir flugáhugamenn tækifærið. Forráðamenn íslenska Þristavinafélagsins buðu Breitling-þristinum upp í dans, það er að vélarnar tvær færu í samsíða flug, sem jafnframt yrði nýtt til ljósmynda- og kvikmyndatöku af vélunum saman.

Francisco Agullo, flugstjóri Breitling-þristsins. Stöð 2/Einar Árnason.

Flugstjóri Páls Sveinssonar í samfluginu var Eyþór Baldursson og Gunnar Arthursson var flugmaður. Flugstjóri Breitlings-þristsins var Francisco Agullo, en rætt var við hann í frétt Stöðvar 2. 

Flugið tók um hálfa aðra klukkustund en frá Reykjavík var flogið yfir Akranes og Mýrar, meðfram Löngufjörum á Snæfellsnesi og að Arnarstapa. Þar var snúið við og flogin sama leið til baka. Tvær aðrar minni vélar, með ljósmyndara og kvikmyndatökumenn um borð, fylgdu með.

Sturla Snorrason módelsmiður við líkanið af Gljáfaxa. Stöð 2/Einar Árnason.

„Elstu menn muna eftir samflugi tveggja þrista árið 1955 eða 1956. Ég hef ekki neinar heimildir um að þristar hafi flogið svona saman síðan þá. Þannig að þetta er gríðarlega langt síðan og þú getur ímyndað þér eftirvæntinguna hjá okkur að taka þátt í þessu,“ sagði Tómas Dagur Helgason, formaður Þristavinafélagsins, áður en lagt var upp í flugið.

Hér má sjá viðtal við Tómas Dag úr fréttum Stöðvar 2.

Þristarnir á Reykjavíkurflugvelli voru raunar þrír, sá þriðji er flugmódel, einn áttundi af stærð hinna. Módelsmiðurinn Sturla Snorrason var mörg ár að smíða gripinn sem lítur nákvæmlega eins út og íslenski þristurinn þegar hann var Gljáfaxi Flugfélags Íslands, áður en hann var tekinn í þjónustu Landgræðslunnar.

Þristarnir þrír á Reykjavíkurflugvelli í dag. Stöð 2/Einar Árnason.

Tengdar fréttir

Þrír þristar saman á Reykjavíkurflugvelli

Sjaldséður viðburður verður á Reykjavíkurflugvelli um sjöleytið í kvöld þegar tveir þristar á áttræðisaldri, forngripir af gerðinni Douglas DC-3, fara í samsíða flug.

Auka hraðann til að ná Reykjavík fyrir lokun

Flugmenn DC-3 flugvélarinnar, sem eru á leiðinni milli Grænlands og Íslands, hafa gefið hreyflunum aukið afl í von um að ná inn til Reykjavíkur fyrir lokunartíma vallarins.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.