Drápið á Justine Damond: Lögreglustjóri í Minnesota segir af sér

Lögreglustjóri í Minnesota í Bandaríkjunum hefur sagt af sér eftir að lögreglumaður skaut óvopnaða ástralska konu til bana í úthverfi Minneapolis-borgar í síðustu viku.

Hin fertuga Justine Damond var þar skotin eftir að hafa hringt í neyðarlínuna til að tilkynna um að hún hafi heyrt í konu öskrandi og sagst telja að nauðgun væri að eiga sér stað í húsasundi nærri heimili hennar.

Lögreglustjórinn Janee Harteau hafði áður sagt að atvikið „hafi ekki átt að eiga sér stað“.

Í frétt BBC kemur fram að borgarstjóri Minneapolis-borgar í Minnesota, Betsy Hodges, segist hafa samþykkt afsögn Harteau enda hafi hún misst tiltrú á störfum lögreglustjórans.

Mikil reiði í Ástralíu

Málið hefur vakið mikla umræðu og reiði í Ástralíu og hefur forsætisráðherrann Malcolm Turnbull lýst því sem „óútskýranlegu“ og sem „hneykslanlegu drápi“.

Lögregluþjónninn, Mohamed Noor, skaut Damond þegar hún nálgaðist lögreglubílinn sem hann sat í og var hún þá klædd í náttföt. Noor, sem sat í farþegasætinu skaut konuna yfir félaga sinn út um gluggann bílstjóramegin. Noor hefur neitað að ræða við þá sem nú rannsaka atvikið, en reglur kveða á um að yfirvöld geti ekki þvingað hann til þess að gefa skýrslu um atvikið.

Samstarfsfélagi Noor, Matthew Harrity, sagði þó rannsakendum að þeir hefðu heyrt hávær hljóð á sama tíma og Damond gekk að bíl þeirra.

Lögreglan í Minneapolis hefur birt upptökur af talstöðvarsamskiptum lögreglunnar eftir að Damond var skotin. Þar má heyra lögregluþjón segja að svo virðist sem að flugeldar hafi verið sprengdir á svæðinu.

Báðir lögregluþjónarnir voru með slökkt á vestismyndavélum sínum þegar Damond var skotin og einnig var slökkt á myndavélinni í mælaborði bíls þeirra.