Hugmyndir að fjölskylduvænum samverustundum í sumarfríinu

Þær Þórey Einarsdóttir og Anna Lísa Björnsdóttir eignuðust báðar tvö börn með 20 mánaða millibili. Þegar þær fóru að bera saman bækur sínar uppgötvuðu þær að flest foreldranámskeið voru haldin á óheppilegum tíma fyrir barnafjölskyldur. Þess vegna stofnuðu þær vefsíðuna kurz.is, til þess að bjóða foreldrum að taka uppeldisnámskeið á netinu þegar þeim hentar og á þeirra forsendum. Þá er hægt að nýta tímann betur.

Núna er hægt að hjálpa þeim að láta námskeiðið verða að veruleika með því að kaupa það á Karolina Fund. Námskeiðið Að læra að skilja hegðun og líðan barnsins er kennt af Margréti Birnu og Hrund sálfræðingum og sérfræðingum í hegðun og líðan barna, unglinga og foreldra þeirra.

Þær Þórey og Anna mæla með að nýta dagana vel í sumar með börnunum og settu saman lista yfir hugmyndir að gefandi og fjölskylduvænum samverustundum.

Leikvellir og landakort

Prentið út kort af ykkar bæjarfélagi og merkið inn leikvelli eða staði sem ykkur langar til þess að heimsækja. Útbúið nesti og leyfið börnunum að vera fararstjórar.

Sull og bull

Að hoppa í pollum er stórskemmtilegt fyrir alla aldurshópa. Ef veðrið er gott er hægt að búa til polla eða fara í fjöruna og sulla. Það er aldrei of seint að læra að fleyta kerlingar og jafnvel er hægt að æfa sig í að kasta steinum með tánum, það þjálfar skynþroskann hjá börnum og kennir þeim á líkamann.

Fjársjóðsleit

Að fara út með krukku og og rannsaka lífríkið undir steinum og í moldinni er góð skemmtun.

Heimapartí

Það getur verið gaman að halda bara partí heima. Til dæmis er skemmtilegt að halda furðufatatískusýningu með fjölskyldunni, byggja hús úr púðum og teppum og elda svo saman þar sem allir geta lagt sitt af mörkum.

Lestur

Lestur er frábær samverustund og það er mjög mikilvægt að börnin haldi lestri við í sumarfríinu.

Bókasöfn og söfn

Flest bókasöfn hringinn í kringum landið eru með skemmtileg barnahorn. Norræna húsið er enn fremur með æðislega aðstöðu fyrir börn. Garðarnir hjá Listasafni Einars Jónssonar og Ásmundarsafni eru skemmtilegir fyrir alla. Snæfellsstofa við Skriðuklaustur er með sérlega áhugaverða og fallega sýningu, Veraldarhjólið, sem fjallar um hringrás og mótun náttúrunnar.

Garðar og leikvellir

Lystigarðurinn á Akureyri og Hljómskálagarðurinn í Reykjavík bjóða upp á frábæra aðstöðu fyrir fjölskylduna. Bjössaróló í Borgarnesi, Kjarnaskógur við Akureyri og Raggagarður í Súðavík eru líka þess virði að heimsækja og hreyfa litla kroppa.