Gefur skólunum færi á að bregðast fyrr við

„Þetta próf mun færa okkur möguleika á því að veita snemmbúna íhlutun fyrr,“ segir Magnús Þór Jónsson, skólastjóri Seljaskóla. Svokallaður lesferill, sem er próf sem metur lesfimi grunnskólanema, var lagður fyrir í 1. til 10. bekk grunnskóla í fyrsta sinn í vetur.

Niðurstöður prófanna verða gerðar opinberar í næsta mánuði. Skólastjórar og kennarar í skólunum fengu hins vegar niðurstöðurnar í júní.

Arnór Guðmundsson, forstjóri Menntamálastofnunar, segir 93 prósent af skólunum hafa nýtt sér prófið og það hafi í heild verið lagt fyrir 75 prósent nemenda. „Við höfum ekki fengið neitt nema jákvæð viðbrögð við þessu,“ segir Arnór um viðbrögð skólastjóra og nemenda.

Lesferillinn er lagður fyrir í hverjum árgangi og niðurstöðurnar eru mjög misjafnar, en heilt yfir ber ég vonir til þess að þetta verði til góðs til lengri tíma litið. Þetta muni skila okkur betri niðurstöðum,“ segir skólastjóri Seljaskóla. Elín Elísabet Magnúsdóttir, starfandi skólastjóri í Glerárskóla á Akureyri, segir að það hafi verið talsverð vinna að leggja prófið fyrir en þrátt fyrir það hafi gengið ágætlega. „Það tekur alltaf einhvern tíma að koma svona prófum á og þetta var talsvert handtak,“ segir Elín Elísabet en vill taka sér tíma til að meta reynsluna. „Mér finnst ekki endilega hægt að meta það eftir eitt ár,“ segir hún.

Lesferill er nýtt matstæki sem unnið er af læsisteymi Menntamálastofnunar í samstarfi við aðra sérfræðinga stofnunarinnar. Lesferli er ætlað að meta grunnþætti læsis, svo sem lesfimi, lesskilning, ritun, orðaforða og málskilning. Hafist var handa við að vinna þessi próf í október 2015 þegar læsisteymi Menntamálastofnunar hóf störf.

Læsisteymið var stofnað eftir að niðurstöður PISA könnunar voru gefnar út árið 2013 sem sýndu að hlutfall 15 ára íslenskra nemenda sem ekki getur lesið sér til gagns hafði hækkað úr 15 prósentum árið 2000 í 21 prósent árið 2012. Niðurstaða íslenskra nemenda var fyrir neðan meðaltal í könnuninni.