Strákarnir okkar umhyggjusamir | Myndir og myndband

Íslenska karlalandsliðið í fótbolta spilar gríðarlega mikilvægan leik við Króatíu á Laugardalsvellinum í kvöld í undankeppni HM en þjóðirnar eru að berjast um efsta sæti riðilsins sem gefur farseðil á HM í Rússlandi næsta sumar.

Strákarnir hafa verið uppteknir við að undirbúa sig líkamlega og andlega fyrir Króatana með stífum æfingum og liðsfundum en þeir gáfu sér samt tíma til að taka á móti góðum gestum.

Strákarnir fengu nefnilega góða heimsókn í vikunni þegar aðildarfélög Umhyggju, félags langveikra barna, komu á hótelið.

Allir fengu áritanir, myndir og gott spjall og var bros á öllum andlitum - leikmanna og krakkana.

Hér fyrir neðan má sjá bæði myndir og myndband frá ferðinni sem Knattspyrnusamband Íslands setti inn á fésbókarsíðu sína.