Opið bréf til stjórnar Strætó

Góðan dag.

Mig langar að kvarta undan þjónustu ykkar fyrir fatlaða.

Ég held utan um reiðnámskeið fyrir fatlaða í Hestamannafélaginu Herði í Mosfellsbæ. Við erum með námskeið alla daga nema sunnudaga og fáum því nemendur alla daga sem nota ykkar þjónustu. En tímasetningarnar ykkar eru algjör hörmung!

Tímarnir okkar eru í klst. eða frá 14.45 til 15.45. Þið eruð að koma með nemendur allt frá 14.15 til 14.30. Flesta sækið þið milli 14.45 og 16. En þegar þið komið trekk í trekk og sækið kl. 16.30 er það ólíðandi!

Það er nær alltaf sami nemandinn sem lendir í þessu, hann er fjölfatlaður í hjólastól og þarf að bíða í kuldanum og mikilli óvissu um hvort og hvenær hann verður sóttur. Eins hefur hann lent í því að þið komuð svo snemma, kl. 14.00, að við vorum ekki mætt og þið fóruð með hann heim aftur.

Þetta er ekki vegna þess að bílarnir eru pantaðir svo snemma eða seint.

Þessir einstaklingar sem eru að koma eru kannski búnir að bíða í viku eftir að komast á hestbak og hlakka mikið til. Þeir eru síðan keyrðir heim vegna þess að þið komið alltof snemma.

Okkar starfsemi byggist á sjálfboðavinnu og höfum við ekki alltaf getu til að bíða eftir bílunum eða til að koma löngu fyrir tímann, við erum jú líka manneskjur sem höfum ýmislegt annað að gera en að bíða eftir ykkur.

Eins er alveg kostulegt þegar þið eruð að senda þrjá bíla og allir eiga að keyra á sömu endastöð þegar nóg er að senda einn bíl.

Eða þegar bílstjórinn var sendur af stað og látinn sækja nemanda í hjólastól, í allt of litlum bíl og nemandinn komst ekki inn í bílinn. Nei, honum hafði verið sagt frá þjónustuverinu að viðkomandi væri í samanbrjótanlegum stól og gæti setið í bílsæti. Það var jú rétt en það gleymdist að nemandinn komst ekki í bílinn nema keyrður inn í hjólastólnum! Ég held að þið verðið að endurskoða ykkar verklagsreglur og vinnubrögð.

Bílstjórarnir eru margir að gefast upp, því auðvitað eru þeir skammaðir þegar þeir loksins mæta. En það er endalaust bætt á þá ferðum, þeir eiga kannski að vera 5 mín. úr Klettaskóla upp í Mosfellsbæ á háannatíma í umferðinni.

Þó það sé gott á blaði er það ekki þannig í raun. Takið tillit til þeirra sem verið er að þjónusta. Sýnið þeim virðingu og munið að aðgát skal höfð í nærveru sálar.