Zidane með níu breytingar en Real Madrid vann samt stórsigur

Real Madrid jafnaði Barcelona að stigum á toppi spænsku úrvalsdeildarinnar með 2-6 útisigri á Deportivo La Coruna á Riazor í kvöld.

Zinedine Zidane, knattspyrnustjóri Real Madrid, gerði níu breytingar á byrjunarliðinu frá leiknum gegn Barcelona á sunnudaginn og hvíldi margar af stærstu stjörnum liðsins, þ.á.m. Cristiano Ronaldo. Það kom þó ekki að sök.

James Rodríguez skoraði tvívegis fyrir Real Madrid og þeir Álvaro Morata, Lucas Vásquez, Isco og Casemiro sitt markið hvor.

Real Madrid er með jafn mörg stig og Barcelona á toppnum en á leik til góða á Börsunga. Barcelona hefur leikið 34 leiki en Real Madrid 33 leiki.