Erdoğan um niðurstöðuna: Söguleg stund fyrir Tyrki

Recep Tayyip Erdoğan, forseti Tyrklands, hefur lýst yfir sigri í þjóðaratkvæðagreiðslu um breytingar á stjórnarskrá landsins. Breytingarnar veita Erdoğan töluvert meiri völd en hann hafði áður og segir hann að skýr meirihluti hafi stutt breytingarnar. Stjórnarandstaðan vill endurtalningu og telja að brögðum hafi verið beitt.

Erdoğan ávarpaði þjóðina þegar 99% atkvæða höfðu verið talin. Kjörnefnd hefur nú staðfest að meirihluti kjósenda hafi kosið með breytingunni.  51,37% kjósenda kusu með breytingunum en 48,63% kusu gegn þeim. Alls kusu um 47,5 milljónir manns.

Í ávarpinu óskaði hann eftir því að niðurstaða atkvæðagreiðslunnar yrði virt. Þá viðraði hann einnig þann möguleika að haldin yrði atkvæðagreiðsla um hvort Tyrkir myndu taka upp dauðarefsingu á ný.

„Í dag hefur Tyrkland tekið sögulega ákvörðun,“ sagði Erdoğan meðal annars.

„Með krafti fólksins höfum við hrint í framkvæmt mikilvægustu breytingunni í sögu landsins okkar.“

Völd forseta aukin á kostnað þingsins

Í þjóðaratkvæðagreiðslunni var kosið um breytingar á stjórnarskrá Tyrklands sem fela í sér grundvallar breytingar á stjórnskipun landsins. Embætti forsætisráðherra verður lagt niður og völd forsetans verða aukin á kostnað þingsins.

Þannig mun Erdoğan hafa forræði yfir fjárlögum Tyrklands, mun geta skipað og veitt ráðherrum lausn frá embætti og mun geta tilnefnt bæði saksóknara og dómara við tyrkneska dómstóla.

Meðlimir stjórnarandstöðunnar höfðu véfengt að slíkar breytingar á stjórnarskránni væru nauðsynlegar, en Erdoğan sagði að þeim væri ætlað að auka öryggi landsins, níu mánuðum eftir valdaránstilraunina í júlí á síðasta ári.

Stjórnarandstaðan telur breytingarnar fela í sér of mikið vald forseta og hafa nú þegar krafist þess að 60% atkvæða verði endurtalinvegna þess að óstimplaðir kjörseðlar voru teknir gildir. Íbúar í Istanbúl eru þegar farnir að streyma á götur út til að mótmæla niðurstöðunum, samkvæmt frétt Reuters.