Umsjónarmaður á Bessastöðum hlunnfarinn um margra milljóna laun

Héraðsdómur Reykjavíkur hefur dæmt að umsjónarmaður með forsetabústaðarins á Bessastöðum hafi verið hlunnfarinn um 7,5 milljónir króna í launagreiðslur á árunum 2010 til 2014.

Þetta kemur fram í frétt RÚV, en dómurinn féll á þriðjudag og hefur ekki verið birtur.

Þar segir að starfsmanninum hafi verið gert að vera til staðar á Bessastöðum allan sólarhringinn í rúmlega hálft fimmta ár ef frá er talið vaktafrí aðra hverja helgi. Manninum hafi ekki verið greitt fyrir það að vera á bakvakt.

Dómurinn metur það svo að til viðbótar við 250 klukkustunda vinnuskyldu á mánuði, hafi maðurinn í reynd verið á bakvakt allan þann tíma sem hann starfaði á Bessastöðum og eigi hann inni laun fyrir það.

RÚV segir frá því að maðurinn hafi sinnt ýmsum störfum á Bessastöðum, meðal annars almennri vörslu á staðnum, eftirliti, umsjón með húsakosti og lóð, sem og tækni- og öryggiskerfum og fleiru. Sagði hann fyrir dómi að hann hafi í reynd verið fastur á Bessastöðum og vinnuskyldu hans aldrei lokið. Einnig hafi hann þurft stundum þurft að taka að sér hlutverk bílstjóra forsetans, stundum að næturlagi.

Íslenska ríkið lagði í vörn sinni áherslu á minna hafi verið að gera fyrir manninn þegar forsetinn var ekki á landinu, sem hafi verið á stórum hluta ársins. Þá hafi hann verið með hærri laun en forverinn og átt kost á að sinna háskólanámi samhliða starfi sínu sem umsjónarmaður. Héraðsdómur taldi hins vegar þessa þætti engu máli skipta.